ԵՐԵՎԱՆ, 29 նոյեմբերի./Նովոստի-Արմենիա/. Հավաքական անվտանգության պայմանագրի կազմակերպությունը (ՀԱՊԿ) աջակցում է Ղազախստանի թեկնածությանը որպես 2009թ. ԵԱՀԿ նախագահի , հինգշաբթի ԵԱՀԿ-ն արտգործնախարարների մակարդակով 15-րդ համագումարի ժամանակ հայտարարեց կազմակերպության գլխավոր քարտուղար Նիկոլայ Բորդյուժան։ Համագումարը տեղի է ունենում Մադրիդում։
«Մենք մեր աջակցությունն ենք հայտնում Ղազախստանի թեկնածությանը 2009թ. ԵԱՀԿ-ում նախագահելու հարցում և համոզված ենք, որ դա թույլ կտա նոր խթան ներդնել Կազմակերպության զարգացման գործում, կապահովի նրա բոլոր մասնակիցների իրավահավասարությունը, ինչպես նաև ԵԱՀԿ ղեկավար կառույցներում աշխարհագրական հավասարակշռության պահպանման արդարությունը»,- Բորդյուժիի խոսքերը մեկնաբանեց ՀԱՊԿ լրատվական ծառայության ներկայացուցիչը։
ՀԱՊԿ անդամ-պետությունները, հիշեցրեց նա, մի շարք հստակ ձևակերպված առաջարկություններ են ներկայացրել ԵԱՀԿ գործունեության արդյունավետությունը բարձրացնելու նպատակով։ Դրանք, մասնավորապես, նախագծերն են այն որոշումների, որոնք առնչվում են թմրամիջոցների անօրինական շրջանառության սպառնալիքի դեմ պայքարին, ԵԱՀԿ կանոնադրության մշակմանը, Ժողովրդավարության և մարդու իրավունքների գրասենյակի (ԺՄԻԳ) գծով ընտրություններին հետևելու լիազորությանը, հաղորդում է «ՌԻԱ Նովոստին»։
«Այս փաստաթղթերի ընդունումը կարող էր քայլ դառնալ ԵԱՀԿ-ն՝ որպես լիարժեք միջազգային կազմակերպության փոխակերպվելու ճանապարհին, նրա օրակարգում բոլորիս համար նոր մարտահրավերներին և սպառնալիքներին համատեղ արձագանքելու հարցեր ընդգրկելու, ինչպես նաև նրա բոլոր մասնակիցների շահերից բխող մոնիտորինգային մեխանիզմների կատարելագործման առումով»,- ընդգծեց ՀԱՊԿ գլխավոր քարտուղարը։
Բորդյուժան նաև նշեց, որ ՀԱՊԿ անդամ-պետությունները կողմ են ԵԱՀԿ անվտանգության ոլորտում համագործակցության խորհրդաժողովի դերի բարձրացմանը և կոչ են անում ակտիվացնել Կազմակերպության ջանքերը՝ ռազմաքաղաքական ուղղությամբ։
Նա ավելացրեց, որ ՀԱՊԿ-ն «պատրաստ է արդյունավետ փոխգործակցել ԵԱՀԿ-ն և նրա կառույցների հետ՝ մեր լիազորության մեջ մտնող բոլոր հարցերում»։
ՀԱՊԿ-ն մեջ մտնում են Հայաստանը, Բելառուսը, Ղազախստանը, Կիրգիզիան, Ռուսաստանը, Տաջիկստանը և Ուզբեկստանը։ --0—
