«Սասնա ծռեր»–ի անդամները բժիշկներին ազատելու պայման են ներկայացրել

ԵՐԵՎԱՆ, 27 հուլիսի. /Նովոստի–Արմենիա/. ՊՊԾ գնդի տարածքը զավթած «Սասնա ծռեր» խումբը պայման է ներկայացրել բժիշկներին ազատելու դիմաց, ասվում է խմբի Facebook-ի էջում։

«Բժիշկներին բաց կթողնենք այն դեպքում, երբ նախարարն անձամբ կներկայանա և այդ տարածքում կկազմակերպի վիրահատություններ»,– ասվում է խմբի գրառման մեջ։

Ավելի վաղ հաղորդվել էր, որ «Սասնա ծռեր» խումբը պատանդ է վերցրել բուժաշխատողների, սակայն ավելի ուշ «Հիմնադիր խորհրդարանի» անդամ Ալեք Ենիգոմշյանը հերքեց այդ տեղեկատվությունը` հայտնելով, որ այն չի համապատասխանում իրականությանը։

«Նման բան չկա: Տղաները պնդում են, որ նրանք բժիշկներին ՊՊԾ գնդի շենքում պատանդ չեն վերցրել և պնդում են, որ նրանք կարող են հանգիստ հեռանալ, երբ նրանց փոխարինի բժիշկների մեկ այլ հերթափոխ», - ասել է նա։

Ընդդիմադիր Ժիրայր Սեֆիլյանի զինված կողմնակիցները հուլիսի 17–ին մուտք են գործել ՊՊԾ գնդի տարածք։ Ներխուժման ժամանակ զոհվել է գնդապետ Արթուր Վանոյանը։ Մարմնական վնասվածքներով հիվանդանոց է տեղափոխվել վեց մարդ` հինգ ոստիկան և զինված խմբի անդամներից մեկը։

Հուլիսի 20–ի լույս գիշերը ՊՊԾ շենքի հարակից տարածքում զանգվածային անկարգություններ են կատարվել, որոնց հետևանքով տուժել է 62 մարդ, նրանցից 37–ը` ոստիկաններ։ Քրեական գործ է հարուցվել զանգվածային անկարգությունների կազմակերպման փաստով, մեղադրանք է առաջադրվել վեց քաղաքացիների, ևս վեցը ձերբակալվել են։ -0-