Պատգամավոր. պատերազմի պայմաններում Հայաստանում բանակից տարկետումը հնարավոր չէ

ԵՐԵՎԱՆ, 2 մայիսի. /Նովոստի-Արմենիա/. Որպես պատերազմական վիճակում գտնվող երկիր` Հայաստանում հնարավոր չէ խոսել բանակից տարկետման հնարավորության մասին, երկուշաբթի մամուլի ասուլիսի ժամանակ հայտարարեց Հայաստանի հանրապետական կուսակցության պատգամավոր Շիրակ Թորոսյանը:

«Տարկետման իրավունքի չեղարկումը երկրի ազգային անվտանգության հարց է», - հայտարարեց պատգամավորը:

Ղարաբաղաադրբեջանական շփման գծում ստեղծված իրավիճակի պայմաններում, հայ հասարակության շրջանում մեծ իրարանցում է առաջացրել կառավարության մտադրության հայտարարությունն այն մասին, որ ազգային ժողովի դիտարկմանն է ներկայացվելու զորակոչային տարիքին հասած ուսանողների համար բանակից տարկետման իրավունքի չեղարկման օրինագիծը: Ծրագիրը նախատեսվում է ազգային ժողով ներկայացնել առաջիկա ամսվա ընթացքում:

Թորոսյանը կտրականապես չհամաձայնվեց տարածված կարծիքի հետ, որ բանակում ծառայելուց հետո երիտասարդները ավելի քիչ են հետաքրքրվում կրթությամբ և գիտությամբ, ինչը հետագայում բացասաբար է ազդում երկրում այդ ոլորտների զարգացման վրա:

«Ես դասավանդում եմ ԵՊՀ-ում և կարող եմ պնդել, որ մենք ունենք հիանալի երիտասարդներ, ովքեր բանակում ծառայելուց հետո ավելի լուրջ են վերաբերվում գիտական հետազոտությունների անհրաժեշտությանը», - նշեց Թորոսյանը:

«Ժառանգություն» կուսակցության պատգամավոր Թևան Պողոսյանն իր հերթին ավելացրեց, որ Հայաստանում դեռ լուծված չէ զինծառայությունից ազատվելու կամ տարկետման հարցերում կաշառակերության ռիսկի խնդիրը: «Չնայած այդ ուղղությամբ ձեռնարկված քայլերին` կաշառակերության ռիսկերը ամբողջությամբ չեն վերացել», - նշեց պատգամավորը:

Գործող օրենսդրության համաձայն, ՀՀ զինված ուժերում ծառայությունից տարկետում ստանում են զորակոչային տարիքի հասած Հայաստանի այն քաղաքացիները, ովքեր ՀՀ պետական բուհերում սովորում են անվճար և որոնց համար Բանակում ծառայելուց տարկետում է ամրագրված: Նման արտոնություն է տրվում նաև այն ուսանողներին, ովքեր սովորում են Հայաստանի սահմաններից դուրս` միջպետական համաձայնությունների հիման վրա: -0-