Նախընտրական լեզվակռիվ. Աշոտյանի կոշտ պատասխանը Փաշինյանին

ԵՐԵՎԱՆ, 28 մարտի. /Նովոստի-Արմենիա/. Նախընտրական վիճաբանություն է ծավալվում Հայաստանի հանրապետական կուսակցության փոխնախագահ Արմեն Աշոտյանի և «Ելք» նախընտրական դաշինքի առաջնորդներից մեկի, խորհրդարանի պատգամավոր Նիկոլ Փաշինյանի միջև։

Փաշինյանի` Աշոտյանի հորդորի պատասխանին սոցցանցում արձագանքել է Արմեն Աշոտյանը` Փաշինյանի գրառումը լկտիություն անվանելով։

«Ասում են` Նիկոլը իմ քաղաքակիրթ հորդորին արձագանքել է լկտիանալով։ Ափսոս։ Մի պահ մոռացել էի, որ սեփական սխալն ընդունել ի վիճակի են միայն ուժեղ մարդիկ»,– գրել է ՀՀԿ փոխնախագահը։


«Ինչ վերաբերում է քանիցս քաղաքական սեռափոխության ենթարկված էակներին, ապա նրանց մնում է քաղաքական մայրուղու վրա սպասել հերթական պատվիրատուին»,– ավելացրել է նա։

Ավելի վաղ «Իրազեկ քաղաքացիների միավորում» հասարակական կազմակերպությունը հրապարակել է հանրապետության մանկապարտեզների և դպրոցների` հարյուրից ավելի տնօրենների հետ զրույցների ձայնագրությունները։ Կազմակերպության անդամները, ներկայանալով որպես ՀՀԿ–ի անդամներ, իմացել են, որ ուսումնական հաստատությունների ղեկավարները Հայաստանի հանրապետական կուսակցության համար քվեարկելու պատրաստ ընտրողների ցուցակներ են կազմում։ Այդ կապակցությամբ Փաշինյանը նախօրեին ասել է, որ պետք է «հայկական դպրոցն ազատել քաղաքական մարմնավաճառներից»։

Արմեն Աշոտյանն ասել է, որ Նիկոլ Փաշինյանը պետք է ներողություն խնդրի մանկապարտեզների և դպրոցների ուսուցիչներից` հասցրած վիրավորանքի համար, ինչի կապակցությամբ Փաշինյանը գրառում է կատարել Facebook–ում` կոչ անելով Աշոտյանին Աշոտյան լինել։ -0-