Մենք բոլորս նույն ժողովրդի զավակներն ենք. Մայր Աթոռ

ԵՐԵՎԱՆ, 30 հուլիսի. /Նովոստի-Արմենիա/. Հայ հոգևորականներն անընդունելի են համարում ամեն կարգի անօրինական քայլ ու բռնության միտված գործողություն, որոնք կարող են պատճառ դառնալ արյունահեղության և վտանգելպետականության ապագան, հայտնում է Արմենպրեսը՝ հղում անելով Մայր Աթոռի Սուրբ Էջմիածնի Տեղեկատվական համակարգի հաղորդմանը։

Ըստ հաղորդագրության, շաբաթ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի նախագահությամբ տեղի է ունեցել Վանական խորհրդի ընդլայնված նիստ, որին հրավիրված էին Մայր Աթոռում պաշտոնավարող և հայաստանյան թեմերի առաջնորդ եպիսկոպոսները և հանդես են եկել մայրաքաղաքում ստեղծված իրավիճակին վերաբերող ուղերձով։

Ուղերձում, մասնավորապես, ասվում է. «Երևանում վերջին օրերին ծավալվող իրադարձությունները խաթարել են մեր կյանքի խաղաղությունը: Խորապես ցավ ենք ապրում, որ լարված իրավիճակը երեկ երեկոյան հանգեցրեց նոր բախումների, ինչի հետևանքով վիրավորվեցին տասնյակ մարդիկ` ցուցարարներ, ոստիկաններ և լրագրողներ»։

 Ժողովականներն ընդգծել են, որ արյունահեղության սպառնալիք ստեղծող և պետականության ապագան
վտանգող ամեն կարգի անօրինական քայլ ու բռնության միտված գործողություն անընդունելի է
Հոգևորականները կոչ են արել հայ ժողովրդին չտրվել զգացմունքայնությանը, մերժել հակամարտությունը, կամք դրսևորել` ընթանալու երկխոսության ճանապարհով, հատուկ ընդգծելով, որ մենք բոլորս նույն ժողովրդի զավակներն ենք, «նույն տեսիլքն ունենք հզոր ու պայծառ Հայրենիքի և որպես հարազատ ժառանգները մեր հայրենաշեն նախնիների` պարտավոր ենք առաջնորդվելու համազգային շահերի նախանձախնդրությամբ»։

Ուղերձում նշվում է, որ Հայաստանում ծառացած և լուծում պահանջող բազմաթիվ խնդիրներն ու մարտահրավերները պետք է հաղթահարվեն հնարավորինս շուտ և փոխըմբռնման ուղով։