ԵՐԵՎԱՆ, 15 մայիսի./Նովոստի–Արմենիա/. Այս տարվա ընթացքում մինչև հունվար կավարտվեն մետրոյի նոր կայարանի նախագծային աշխատանքները, չորեքշաբթի ասուլիսի ժամանակ հայտնեց Երևանի գլխավոր ճարտարապետ Արթուր Մեսչյանը։
«Հուսով եմ, որ այս տարվա ընթացքում մինչև հունվար կավարտենք մետրոյի նոր կայարանի նախագծային աշխատանքները, և մյուս տարվա սկզբից կսկսվեն շինարարական աշխատանքները: Շինարարությունը կսկսենք կամրջից», – նշեց Մեսչյանը` հավելելով, որ հնարավորություն չկա ծրագիրն իրականացնել բյուջետային միջոցներով։
«Կառուցապատողների հետ ենք բանակցում: Հիմա մենք ավելի շատ զբաղվում ենք դիվանագիտությամբ, ոչ թե ճարտարապետությամբ։ 3 տարբեր կառուցապատող ընկերությունների հետ ենք աշխատում, այսօր դեռ անուններ չեն ուզում տալ, բայց կառուցապատողները շահագրգռված են հետևյալ ձևով. Աջափնյակի մետրոպոլիտենի կառուցապատողին հնարավորություն է տրվելու մեծ մոլ կառուցել Թումոյի տարածքի կողքի շրջանում, այսինքն` մետրոպոլիտենի վրա, և մոլի առաջին հարկի միջից է լինելու մետրոպոլիտենի կապը», – նշեց Երևանի գլխավոր ճարտարապետը։–0–