Երևանյան բանտի պետը կարող է զրկվել պաշտոնից ակտիվիստի բողոքների պատճառով

ԵՐԵՎԱՆ, 4 մարտի. /Նովոստի-Արմենիա/. «Նուբարաշեն» քրեակատարողանկան հիմնարկի պետ Ռուբեն Ստեփանյանն առաջիկայում կարող է զրկվել պաշտոնից, գրում է «Հրապարակ» թերթը:

Ինչպես նշում է պարբերականը, «Նուբարաշենի» վերջին իրադարձությունները, մասնավորապես, ակտիվիստ Վարդգես Գասպարիի տեղափոխումն այնտեղ և նրա պատմությունը բանտային իրողությունների վրա բացասաբար կանդրադառնան ՔԿՀ պետ Ռուբեն Ստեփանյանի վրա, ով մտերիմ հարաբերություններ ունի Ազգային ժողովի պատգամավոր գեներալ Սեյրան Սարոյանի հետ:

«Ասում են, որ այս անգամ գեներալի օժանդակությունը չի օգնի: Առաջիկայում նրան կարող են զրկել պաշտոնից»,- ասվում է հրապարակման մեջ:

Նշվում է նաև, որ Ստեփանյանի պոտենցիալ իրավահաջորդը «Դատապարտյալների հիվանդանոց» ՔԿՀ նախկին պետ Արսեն Աֆրիկյանն է` Երևանի քաղաքապետ Տարոն Մարգարյանի հարազատը:

Սկանդալային քաղաքացիական ակտիվիստ Վարդգես Գասպարին ձերբակալվել էր Երևանի Շենգավիթ վարչական շրջանի ընդհանուր իրավասության դատարանի որոշմամբ, սակայն ավելի ուշ ազատ էր արձակվել երկրից չբացակայելու ստորագրությամբ: Գասպարին մեղադրվում է ոստիկանին վիրավորելու և դատարանի նկատմամբ անարգանքի համար: «Նուբարաշեն» տեղափոխվելուց հետո ակտիվիստն ասել է, որ նրան բռնության են ենթարկել բանտախցի մյուս բանտարկյալները: --0--