Երևանում մոլեգնած ուժգին քամու հետևանքով տուժածներ կան

ԵՐԵՎԱՆ, 23 մայիսի. /Նովոստի-Արմենիա/. Երկուշաբթի՝ մայիսի 23-ին, ուժգին քամու հետևանքով տուժել է 9 քաղաքացի. նրանցից 7-ը հիվանդանոց են տեղափոխվել, այս մասին Այս մասին NEWS.am-ին ասել է «Շտապօգնություն» ՓԲԸ-ի տնօրեն Թագուհի Ստեփանյանը:

«9 ահազանգ ենք ստացել: Երկու քաղաքացի տեղում է բուժօգնություն ստացել, 7-ը մարմնական վնասվածքներով տեղափոխվել է հիվանդանոց»,- ասել է Ստեփանյանը:

Այսօր Երևանում ուժեղ քամի է մոլեգնել մայրաքաղաքում և հանրապետության մի շարք համայնքներում: Ժամը 17.00-ից մինչև 18.00-ը Հանրապետության տարածքում քամու ուժգնությունը կազմել է 18-22 մ/վրկ:

Բազմաթիվ տների տանիքներ են պոկվել, ծառեր են արմատախիլ եղել: Հայաստանի ԱԻՆ մամուլի ծառայության հաղորդմամբ, Երևանում ուժեղ քամուց գրանցվել է 135 տան տանիքի կառուցատարրերի, 72 ծառի, 8 գազի և 2 ջրի խողովակաշարի, 6 գովազդային վահանակի, 2 պատուհանի և 16 էլ սյան (էլ. լարեր) վնասվելու վերաբերյալ ահազանգեր, Արագածոտնի մարզային ՃԿԿ-ում՝ 4 դեպք (վնասվել են տան տանիքներ), Արարատի մարզային ՃԿԿ-ում՝ 5 դեպք (տան տանիքներ), Արմավիրի մարզային ՃԿԿ-ում՝ 5 դեպք (տան տանիքներ), Կոտայքի մարզային ՃԿԿ-ում՝ 8 դեպք (1 ծառ, 6 տան և 1 դպրոցի տանիքներ), Գեղարքունիքի մարզային ՃԿԿ-ում՝ 5 դեպք (2 ծառ, 1 դպրոցի, 1 ավտոտնակի և 1 տան տանիքներ), Լոռու մարզային ՃԿԿ-ում 1 դեպք (ծառ):

Ընդհանուր թվով Հանրապետությունում գրանցվել է 269 դեպք, որից 241-ը՝ Երևանում, իսկ 28-ը՝ մարզերում, հայտնում է ԱԻՆ մամուլի ծառայությունը։