ԵՐԵՎԱՆ, 26 ապրիլի./Նովոստի–Արմենիա/. Հայ գրոսմայստեր Լևոն Արոնյանը հինգշաբթի կոչ է արել Հայաստանում առկա քաղաքական ճգնաժամը լուծել խաղաղ և արժանապատիվ կերպով։
«Միանում եմ բոլորիդ Հայաստանում եւ սփյուռքում, եւ հավատում, որ մեր նպատակներին հասնել կարելի է միայն խաղաղ եւ արժանապատիվ ճանապարհով»,– գրել է նա Facebook–ի իր էջում։
Նա միաժամանակ ընդգծել է, ոև պետք է զգուշանանք այնպիսի քայլերից, որոնք կարող են վտանգել այն ամենը, ինչ մեր ժողովուրդը կառուցել է երկար տարիներ:
«Այո՛, մենք պետք է ավելին պահանջենք, այո՛, մենք կարող ենք ավելին ունենալ: Սակայն, այնպես ինչպես շախմատում, մեր ջանքերը պետք է լինեն համառ եւ գիտակից»,– գրել է նա։
Գրոսմայստերը նկատել է, որ զարգացման են բերում այնպիսի քայլերը, ինչպիսիք են առողջ և մրցունակ տնտեսությունը, պահանջարկ ունեցող աշխատուժը, օրենքի գերակայությունը և հանրային ինստիտուտների ամրապնդումը, կանանց դերի և ազդեցության մեծացումը հասարակության մեջ։
«Եկեք քայլենք այդ ուղղությամբ: Անչափ կարեւոր է սեփական իրավունքների հաստատումն ու կայացումը սկսել մեր իսկ պատասխանատու վերաբերմունքով»,– շեշտել է Արոնյանը։
Հանրապետությունում ապրիլի 13–ից անցկացվող բողոքի լայնածավալ ակցիաների ֆոնին Հայաստանի վարչապետ Սերժ Սարգսյանն ապրիլի 23–ին հայտարարեց իր հրաժարականի մասին։ Նույն օրը Հայաստանի նախագահ Արմեն Սարգսյանն ընդունեց կառավարության հրաժարականը։ Ապրիլի 25–ի հանրահավաքի ժամանակ Նիկոլ Փաշինյանն առաջարկվեց որպես Հայաստանի վարչապետի պաշտոնի թեկնածու։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
