Երևանի տրանսպորտը կաթվածահար վիճակում է. քաղաքապետարանը պարզաբանում է

ԵՐԵՎԱՆ, 13 դեկտեմբերի./Նովոստի–Արմենիա/. Այսօր առավոտյան Երևանի տրանսպորտը կաթվածահար վիճակում էր։

Ծայրամասի բնակիչները ժամերով կանգառներում կանգնած էին, տրանսպորտ չկար։ Մարդիկ բողոքում էին, որ մոտ 1 ժամ կանգառում կանգնած տրանսպորտ են սպասում, իսկ տաքսի ծառայությունների սակագները միանգամից բարձրացել էին։

Խնդրին անդրադարձ է Երևանի քաղաքապետարանի մամուլի խոսնակ Հակոբ Կարապետյանը։


Ստորև ներկայացնում ենք Կարապետյանի Facebook–յան գրառումը.

«Այսօր առավոտվանից հանրային տրանսպորտի մի շարք երթուղիներ չեն աշխատում՝ վարորդների բոյկոտի պատճառով։

Վարորդները պահանջում են աշխատանքային պայմանների բարելավում, մասնավորապես, աշխատավարձի բարձրացում։

Ներկայումս քաղաքապետարանը հանրային տրանսպորտի վարորդներին վճարում է մաքուր (հարկերը հանած) շուրջ 260 000 դրամ աշխատավարձ՝ 15 օրվա աշխատանքի համար։

Մեր տեղեկությունների համաձայն, որոշ վարորդներ պահանջում են նաև վերադառնալ վճարման նախկին «պլանային» համակարգին, երբ վարորդը ստանում էր նվազագույն աշխատավարձ և ուղեվարձերից «սև» եկամուտ։

Քաղաքային իշխանությունը վճռական է տրանսպորտի բարեփոխումների հարցում և շարունակելու է հետևողական քայլերը՝ հանրությանը որակյալ տրանսպորտային ծառայություն մատուցելու և օրինականության դաշտում աշխատելու ուղղությամբ։

Միևնույն ժամանակ, մենք շարունակաբար բարելավում ենք և բարելավելու ենք վարորդների աշխատանքային պայմանները։

Նմանատիպ սաբոտաժը ծայրահեղ անընդունելի է և չի կարող արդյունք տալ։
Քաղաքապետարանի համապատասխան ստորաբաժանումները այս պահին աշխատանքներ են տանում՝ վիճակը շտկելու և տրանսպորտի բնականոն աշխատանքը վերականգնելու ուղղությամբ։

Հայցում ենք Ձեր ներողամտությունը անհարմարության համար»։–0–