Տեղեկացնեմ, որ այլևս չեմ կատարում ՀՀ ԱԳՆ մամուլի քարտուղարի պարտականությունները.Աննա Նաղդալյան

ԵՐԵՎԱՆ, 31 մայիսի./Նովոստի–Արմենիա/. ՀՀ ԱԳՆ մամուլի քարտուղար Աննա Նաղդալյանը վայր է դրել արտաքին քաղաքական գերատեսչության մամուլի քարտուղարի լիազորությունները։


Նա այս մասին հայտնել է Facebook–յան իր էջում։

Ստորև ներկայացնում ենք Նաղդալյանի գրառումն ամբողջությամբ։

«Հարգելի գործընկերներ,

Տեղեկացնեմ, որ այլևս չեմ կատարում ՀՀ ԱԳՆ մամուլի քարտուղարի պարտականությունները: Ցանկանում եմ շնորհակալություն հայտնել ԶԼՄ բոլոր ներկայացուցիչներին, ԱԳՆ գործընկերներիս, իմ թիմին՝ այս դժվարին և պատասխանատու ժամանակահատվածում արդյունավետ համագործակցության և աջակցության համար:

Առանձնահատուկ շնորհակալություն եմ հայտնում Արա Այվազյանին և Զոհրաբ Մնացականյանին՝ ցուցաբերած վստահության համար. մեծ պատիվ էր աշխատել նման փորձառու և հայրենասեր դիվանագետների հետ:

Հայտնում եմ, որ շարունակելու եմ աշխատանքս դիվանագիտական ծառայությունում:

ԱԳՆ գործունեության վերաբերյալ մեկնաբանությունների և այլ հարցերի համար կարող եք դիմել spokesperson@mfa.am էլեկտրոնային հասցեով»:

Նշենք, որ մայիսի 27–ին Այվազյանը հրաժարական է տվել ԱԳ նախարարի պաշտոնից։ Այս նյութի հրապարակման պահին դեռևս պաշտոնական տեղեկություն չի ստացվել Արա Այվազյանի հրաժարականի ընդունման մասին։

Մայիսի 20–ից համացանցում խոսակցություններ էին տարածվել Այվազյանի հրաժարականի մասին։ Որոշ ԶԼՄ–ների հաղորդմամբ, Այվազյանի հրաժարականի պատճառն այն է, որ նա տեղյակ չի եղել հայ–ադրբեջանական սահմանի դելիմիտացիայի փաստաթղթից։–0–