Սուրենյանը հայտնեց, թե երբ Սկանդինավյան ցիկլոնը կհեռանա Հայաստանից

ԵՐԵՎԱՆ, 30 մարտի./Նովոստի–Արմենիա/. Ապրիլի 2-ի առավոտյան ցիկլոնը կլքի Հայաստանը, և օդը կրկին կտաքանա մինչև 20-22 աստիճան տաքություն։ Նման ջերմաստիճան կպահպանվի մինչև ապրիլի 4-ը։

Այս մասին ասաց Հիդրոօդերևութաբանության և մոնիտորինգի կենտրոնի փոխտնօրեն Գագիկ Սուրենյանն այսօր ասուլիսի ժամանակ։
Նրա խոսքով, Հայաստանում սպասվում է ջերմաստիճանի կտրուկ նվազում՝ կապված Սկանդինավիայից արկտիկական ցուրտ օդային զանգվածների ներթափանցման հետ։

«Սկանդինավյան ցիկլոնին առաջինն արձագանքել են Շիրակի, Լոռու, Տավուշի, Արագածոտնի մարզերը և Կոտայքի մարզի նախալեռները, օդի ջերմաստիճանը երեկվա համեմատ արդեն իջել է 10-12 աստիճանով։ Վաղը. ցիկլոնը կուժեղանա, հատկապես ժամը 16:00-ից հետո, այսինքն՝ կեսօրից հետո հանրապետության ողջ տարածքում սպասվում են տեղումներ, իսկ բարձրադիր գոտիներում՝ ձյան տեսքով»,- ասաց Սուրենյանը։

Նրա խոսքով՝ մարտի 30-ին և 31-ին օդի ջերմաստիճանը Հայաստանում կնվազի 6-8 աստիճանով։

Այդուհանդերձ, ինչպես նշեց օդերևութաբանը, ընթացիկ մարտ ամիսն ամենատաքն է 2018 թվականից հետո։

«Օդի միջին ջերմաստիճանը նորմայից բարձր է 4-5 աստիճանով, իսկ տեղումները՝ նորմայի սահմաններում։ Սակայն հանրապետության շատ շրջաններ սկանդինավյան ցիկլոնի ներթափանցումից հետո տեղումների մակարդակը մարտի 30-ից նորմայից բարձր կլինի»,- նշեց Սուրենյանը։

Նա ասաց, որ օդի բարձր ջերմաստիճանի պատճառով ծիրանենիները սովորականից 20 օր շուտ են սկսել ծաղկել։–0–