«Սովետական Ադրբեջանի տարածքներ կան, որոնք գտնվել և գտնվում են Հայաստանի վերահսկողության ներքո». Փաշինյան

ԵՐԵՎԱՆ, 17 նոյեմբերի./Նովոստի–Արմենիա/. ԱԺ–ում պատգամավորների հետ հարց ու պատասխանի ժամանակ ՀՀ վարչապետ Նիկոլ Փաշինյանը մեկնաբանել է Հայաստանի ինքնիշխան տարածքից 41 քառակուսի կիլոմետրը թշնամու կողմից օկուպացված լինելու վերաբերյալ իր հայտարարությունը։

«Այդ թիվը չի ձևավորվել երեկվա կամ նախորդ օրվա գործողությունների հետևանքով։ Երեկվա գործողություններից հետո էլ այս բալանսը որևիցե ձևով չի փոխվել։ Այսինքն, մեկ շաբաթ առաջ էլ էր այդ 41 քառակուսի կմ-ը, մայիսի 12-ից հետո էլ, և երեկվա գործողությամբ էլ է նույնը»,-ասաց Փաշինյանը:

Նա նշեց, որ դեռ միանշանակ չէ, որ այդ 41 քառակուսի կիլոմետրն ամբողջությամբ վերահսկվում է ադրբեջանական զինված ուժերի կողմից։

«Մայիսի 12-ից հետո տեղի ունեցած գործընթացի հետևանքով տարբեր հատվածներում Ադրբեջանի և մեր ԶՈՒ-ի դիրքերը շախմատաձև դասավորված են, երբեմն՝ անտրամաբանական ձևերով մխրճված մեկը մյուսի մեջ։ Մայիսի 12-ից առաջ էլ մոտ 40 և ավելի կմ ՀՀ տարածք եղել է Ադրբեջանի վերահսկողության ներքո՝ առաջին պատերազմի արդյունքներով։ Մենք այդ տարածքները կոնկրետ հատվածներով գիտենք»,-ընդգծեց վարչապետը։

Փաշինյանի խոսքով՝ առաջին պատերազմից հետո «Սովետական Ադրբեջանի տարածքներ» կան, որոնք գտնվել և գտնվում են Հայաստանի վերահսկողության ներքո։

«Այս հանգամանքների բերումով է, որ շատ կարևորվում է դեմարկացիայի և դելիմիտացիայի գործընթացը, որովհետև երբ ասվում է, որ Ադրբեջանը մեր տարածքներն օկուպացրել է, ինչը ճշմարտություն է, միջազգային հանրության ներկայացուցիչների միջին վիճակագրական ռեակցիան հետևյալն է՝ այդպես է, բայց այնպես չէ, որ այդտեղ միանշանակ բալանս կա․ տարածքներ կան, որ ձեր վերահսկողության ներքո են, բայց պիտի չլինեին ձեր վերահսկողության ներքո և կան տարածքներ, որոնք Ադրբեջանի վերահսկողության ներքո են, որոնք չպետք է լինեին՝ դե յուրե հանգամանքներից ելնելով»,- եզրափակեց նա։–0–