+29
Եղանակը Երևանում
Հայ

Սոնայի մահից հետո այցելել եմ դեպքի վայր, փորձել հանգամանքները պարզել. Փաշինյանի շարասյան կողմից վրաերթի ենթարկված կնոջ հայրն առաջին անգամ խոսել է ողբերգական դեպքի մասին

11:15
01 Հունիսի 2022

ԵՐԵՎԱՆ, 1 հունիսի./Նովոստի-Արմենիա/. Դատախազությունը վերաքննիչ բողոք է ներկայացրել՝ Լեո-Պարոնյան ավտոճանապարհին հղի կնոջ՝ Սոնա Մնացականյանի՝ մահվան ելքով վրաերթի գործով մեղադրյալ ՃՈ ծառայող Արամ Նավասարդյանին կալանավորելու միջնորդությունը մերժելու որոշման դեմ։ Բողոքի քննության օրը դեռ հայտնի չէ: Պաշտպանական կողմն արդեն պատրաստել է բողոքի դեմ առարկությունները: Այս մասին Aravot.am-ին հայտնել է Արամ Նավասարդյանի պաշտպան Ռուբեն Բալոյանը՝ վստահեցնելով, որ կալանքի անհրաժեշտություն չկա, կալանքը, ըստ նրա,  Երևան քաղաքի դատախազի «պրինցիպն է»:

Աղջկա մահվան պատճառ դարձած վթարի հեղինակի ազատության մեջ մնալու հանգամանքը անհանգստացնում է մահացած աղջկա հորը՝ Մնացական Մնացականյանին: Նա Aravot.am-ին պատմել է, որ աղջկա մահից հետո կորցրել է քունը. «Սոնայի մահից հետո այցելել եմ դեպքի վայր, փորձել դեպքի հանգամանքները պարզել: Հարցուփորձ եմ արել կողքի խանութների ու գործող օբյեկտների աշխատողներից, ոչ մեկը ոչինչ չի խոսում, ոնց որ վախեցած լինեն: Այն տպավորությունն է, որ արգելված է խոսելը, ինձ թվում է՝ դա պատահական  չէ, մարդիկ այնքան էմոցիոնալ ընդունեցին դեպքը, դրանից հետո ծնողին տեսնեն ու չխոսե՞ն: Ընդամենը խուսափողական պատասխաններ էին տալիս՝ ես այդ ժամանակ այդտեղ չեմ եղել, չեմ տեսել, չեմ լսել: Հարվածի ձայնն այնքան  ուժեղ է  եղել, որ դեպքի վայրի կողքում  բնակվող բնակարանի ներսում բնակիչը մտածել է, թե երկու մեքենա են իրար խփել: Բայց արի ու տես, որ հարցուփորձ եմ անում մարդկանց, ինձ ոչ մեկը չի պատասխանում: Ես հակված եմ մտածել, որ չխոսելու ցուցում կա: Դա արդեն նշանակում է, որ մեղադրյալը խանգարում է քննությանը: Ի՞նչ է նշանակում՝ ազատության մեջ է ու չի խանգարում»: Անդրադառնալով պնդումներին, թե  եթե Սոնան հետքայլ չկատարեր, վթար տեղի չէր ունենա՝ Մնացական Մնացականյանը շարունակեց. «Ինչի՞ մասին է խոսքը, տեսանյութերը որ նայում ենք, երևում է, որ ամենաքիչը մի 15 վայրկյան 40 մետրից վարորդը տեսնում է, որ  հետիոտնը կանգնած է, այսինքն` հետիոտնը չի կողմնորոշվում՝ հետ, թե առաջ գնա: Իմ աղջիկը վախկոտ չէր, իմ աղջիկը պարաշյուտով էր թռնում, իմ աղջիկը գնացել էր Նորվեգիա՝  հյուսիսափայլը նայելու, իմ աղջիկը գնացել էր Նեպալ՝ քրմերի հետ հանդիպելու, իմ աղջիկը օդանավ էր վարձել Էվերեստը տեսնելու համար: Այս բոլորը պատահական չեմ ասում,  բայց արի ու տես վթարից  առաջ տեսնում ենք, որ ինքը վախենում է, վախեցած նապաստակի է նմանվում: Այդ գազան մեքենան գազանաբար, որ եկել է, իմ աղջիկը վախեցել է,  չի կողմնորոշվել:  Ու հիմա  այն  կարծիքը կա, որ այդ մարդը, ազատության մեջ մնալով, չի խանգարում, հա՞: Այդ մարդը պետք է շարունակի ազատության մեջ մնա՞, որ ընկերներն ու հարազատները գան ու ասեն, որ դու մեղավոր չես: Սուտը մի 10 անգամ, որ ասում ես, ճշմարտության տեղ էլ է անցնում: Ես ուզում եմ մասնակցել վերաքննիչ բողոքի քննությանը, որ դատավորին տեղեկացնեմ իրավիճակը և ցույց տամ՝ արդյոք այդ մարդը չի՞ խանգարում ազատության մեջ լինելով»: Մեր զրուցակցի համոզմամբ՝ եթե Արամ Նավասարդյանը մեքենան դանդաղ վարեր, իր աղջիկը կխուսափեր վթարից կամ հարվածն այդքան ուժգին չէր լինի. «Գնդակի պես տալիս ու թռցնում է: Չի բացառվում, որ հնարավոր լիներ աղջկաս կյանքը փրկել, եթե վթարի ենթարկողը կանգներ ու արագ տեղափոխեր հիվանդանոց: Ի՞նչ է՝ իր ղեկավարը պետք է ասեր՝ ինչո՞ւ ես կանգնում, ինչո՞ւ ես վիրավորին տանում հիվանդանոց: Կարող է րոպեների ընթացքում  տարբերություն լիներ. բոլորը գիտեն՝ սրտի կանգը, եթե 5 րոպեից հետո վերականգնում են, մարդն ապրում է, չէ՞»:

Մնացական Մնացականյանը նաև պատմել է, որ դեպքի օրը Սոնան յոգայից էր դուրս եկել, տուն էր գնում. «Ֆիզարձակուրդում էր, տնից էր աշխատում:  Սիրում էր քայլել, մի քիչ կքայլեր, հետո տրանսպորտ կնստեր, կգնար տուն»: Անդրադառնալով մեղադրյալի պաշտպանի պնդումներին, թե կարգավորողը հրահանգավորվել է Սոնային կանգնել, բայց Սոնան ոչ միայն չի լսել, այլև չլսելով` ձեռքը վերև է բարձրացրել ու շարունակել  քայլել առաջ, Մնացական Մնացականյանը չհամաձայնեց.  «Եթե անցումը լիներ 500 մետր հեռավորության վրա, եթե Սոնայի հետ էիր լինում, պետք է 500 մետր գնայիր, անցումով անցնեիր, եթե լուսացույցի կանաչ լույսը չէր, մի քայլ չէիր  դնում: Սոնան օրենքին հակաճառել ընդհանրապես չէր սիրում: Մեղադրյալի պաշտպանի գործը դա է, պետք է ասի, ինչ-որ կերպ պաշտպանի: Եթե կարգավորողը Սոնային ասել է՝ կանգնիր, ինչո՞ւ է մեքենա բաց թողել, դուք տեղյա՞կ եք, որ այդ ժամանակ մեքենա է անցել , եթե մեքենային բաց է թողել, ինչո՞ւ պետք է Սոնային կանգնեցներ: Այլ մանրամասներ էլ կան, ես հիմա չեմ ուզում ասել: Ես չեմ ուզում քաղաքական երանգ տալ, բայց եթե թեկուզ իր ղեկավարն է նման հրաման արձակել, ղեկավարը պետք է պատժվի բոլոր մակարդակներով: Մարդը պետք է ազատազրկման մեջ մնա, որ մտածելու ժամանակ ունենա, որ գիշերն անքուն  լինի ու խորհելու ժամանակ ունենա, ոչ թե իր տանը հարազատների ներկայությամբ, մասնակցությամբ մտածի, որ ինքն անմեղ է: Եվ, վերջապես, պետք է դաս լինի, որ սրանից հետո նման դեպքեր չլինեն: Ի՞նչ է նշանակում մեկի կյանքը ապահովագրել, պահպանել՝ մյուսի կյանքի հաշվին»:

Հիշեցնենք, որ 2022թ. ապրիլի 26-ին՝ ժամը 18:05-ի սահմաններում, Երևան քաղաքի վերոնշյալ Պարոնյան և Լեո փողոցների խաչմերուկում ՀՀ վարչապետ Նիկոլ Փաշինյանին ուղեկցող ավտոշարասյան մեքենաներից մեկը ավրաերթի է ենթարկել Արարատի մարզի 28-ամյա բնակչուհի Սոնա Մնացականյանին, ով հղի էր: Վրաերթի հետևանքով ստացած մարմնական վնասվածքներով վերջինս տեղափոխվել է «Նաիրի» բժշկական կենտրոն, որտեղ գիտակցության չգալով՝ մահացել է:-0-

Ծանոթացեք լուրերին առաջինն ու քննարկեք դրանք մեր Telegram-յան ալիքում

Partners News
ԱՌԿԱ գործակալություն
Բաժնի այլ նյութեր
16:57
12 Օգոստոսի 2022
Շուրջ 2500 հաշմանդամություն ունեցող անձ հնարավորություն կունենա օգտվել անձնական օգնականի ծառայությունից
Անձնական օգնականի ծառայությունը մատուցվելու է ՀՀ պետական բյուջեի միջոցներով
16:12
12 Օգոստոսի 2022
Ուշադրություն. վտանգավոր սննդամթերքի՝ «Լոռի» և «Չանախ» տեսակի պանիրների, թողարկում է կասեցվել (ՖՈՏՈ)
Ուշադրություն. վտանգավոր սննդամթերքի՝ «Լոռի» և «Չանախ» տեսակի պանիրների, թողարկում է կասեցվել. ՖՈՏՈ
16:01
12 Օգոստոսի 2022
Տեսաուղերձով դիմել է Ալիևին` նշելով, որ ուզում է ստանալ Ադրբեջանի քաղաքացիություն․ մանրամասներ պետական դավաճանության և լրտեսության գործից
Տեսաուղերձով դիմել է Ալիևին` նշելով, որ ուզում է ստանալ Ադրբեջանի քաղաքացիություն․ մանրամասներ  պետական դավաճանության և լրտեսության գործից
16:36
11 Օգոստոսի 2022
Ուշադրություն. ժամանակավորապես փակ կլինի Բագրատունյաց պողոտայից Երևանյան լիճ ուղղության 1-ին գոտին (ՍԽԵՄԱ)
Ուշադրություն. ժամանակավորապես փակ կլինի Բագրատունյաց պողոտայից Երևանյան լիճ ուղղության 1-ին գոտին. ՍԽԵՄԱ
14:52
11 Օգոստոսի 2022
Հաշմանդամություն ունեցող անձանց կտրամադրվի անձնական օգնականի ծառայություն
Հաշմանդամություն ունեցող անձանց կտրամադրվի անձնական օգնականի ծառայություն
12:59
11 Օգոստոսի 2022
Բռնաբարություն, ընտանեկան բռնություն, թմրամիջոցների հայտնաբերում. ոստիկանությունը ներկայացնում է օպերատիվ իրավիճակը օգոստոսի 10–11–ը
Բռնաբարություն, ընտանեկան բռնություն, թմրամիջոցների հայտնաբերում. ոստիկանությունը ներկայացնում է օպերատիվ իրավիճակը օգոստոսի 10–11–ը
12:50
11 Օգոստոսի 2022
Սանոսյան. Տաթև-Աղվանի ճանապարհահատվածի խնդիրները գրեթե լուծվել են, տեղադրվում է ասֆալտի երրորդ շերտը
Կառավարությունը 2 մլրդ 734 միլիոն դրամ հատկացրեց Ստեփանավան - Յաղդան, Սիսիան - Դաստակերտ և Տաթև - Աղվանի  հատվածների ճանապարհաշինարարական աշխատանքները իրականացնելու համար
11:31
11 Օգոստոսի 2022
Ստացել են դեմքի, ազդրի, կրծքավանդակի վիրավորումներ. ՄԻՊ ներկայացուցիչներն այցելել են Ադրբեջանի ԶՈւ–ի կողմից վիրավորված զինծառայողներին
Ստացել են դեմքի, ազդրի, կրծքավանդակի վիրավորումներ. ՄԻՊ ներկայացուցիչներն այցելել են Ադրբեջանի ԶՈւ–ի կողմից վիրավորված զինծառայողներին
17:31
10 Օգոստոսի 2022
Կրակային դիրքում 19-ամյա զինծառայողի դի է հայտնաբերվել
Կրակային դիրքում 19-ամյա զինծառայողի դի է հայտնաբերվել
16:17
10 Օգոստոսի 2022
Երևան–Մեղրի միջպետական ճանապարհի փակ հատվածի երթևեկությունը վերականգնվել է
Երևան–Մեղրի միջպետական ճանապարհի փակ հատվածի երթևեկությունը վերականգնվել է
15:50
10 Օգոստոսի 2022
Բացահայտվել են Իրանից վառելիքի անօրինական մատակարարման սխեմաներ (ՎԻԴԵՈ)
Բացահայտվել են Իրանից վառելիքի անօրինական մատակարարման սխեմաներ. ՎԻԴԵՈ