Ռուբեն Վարդանյանը մտնում է քաղաքականություն. նա պատրաստ է աշխատել Հայաստանում «թեկուզ կոշկակար, թեկուզ հավաքարար, թեկուզ նախագահ»

ԵՐԵՎԱՆ, 26 նոյեմբերի./Նովոստի–Արմենիա/. «Տրոյկա Դիալոգ» ներդրումային ընկերության նախկին սեփականատեր, միլիարդատեր Ռուբեն Վարդանյանը РБК հեռուստաընկերությանը տված հարցազրույցում ասել է, որ մտադիր է քաղաքական կարիերա սկսել։

«Ես պատասխանում եմ (հարցին) կարճ՝ այո: Բայց այլ կերպ ձևակերպեմ այս հարցի պատասխանը, քաղաքականություն եմ մտնում, ոչ թե պարզապես որպես քաղաքական կուսակցություն, այլ երկիրը ղեկավարելու ցանկությամբ»,- ասել է գործարարը։

Վարդանյանի խոսքով՝ ինքն այժմ Հայաստանի զարգացմանը վերաբերող շատ կարևոր հարցերի պատասխաններ գտնելու ակտիվ փուլում է:

«Սրանք բոլորը հարցեր են, որոնք իմ շրջանակներից դուրս են` որպես գործարարի և դուրս են իմ առօրյայից: Այս առումով, իհարկե, ես քաղաքականության մեջ եմ»,- պարզաբանել է նա։

Պատասխանելով այն հարցին, թե պատրա՞ստ է դառնալ Հայաստանի նախագահ, Վարդանյանը նշել է, որ այս մասին իրեն հարցնում են «արդեն շատ–շատ հարցազրույցների ընթացքում»։

«Պետք է անտրամաբանական մարդ լինես, որ հիմա ցանկանաս երկիրը ղեկավարել ներկա վիճակում սովորական հայ հասարակության տեսակետից, որ «ինքն ուզում է երկրի ղեկավարը լինել», որովհետև երկիրը շատ ծանր վիճակում է։ Իրական ապագան միանգամայն անորոշ է»,- նկատել է գործարարը։

Գործարարը կարծում է, որ ներկայումս սուր է դրված Հայաստանի՝ որպես անկախ պետության պահպանման հարցը, ուստի «պետք է շատ համարձակ և ռիսկային մարդ լինես», որ նման իրավիճակում «պետության ղեկավար դառնալու պատասխանատվություն ստանձնես»:

«Այն, ինչ ես ասում եմ, միշտ ասել եմ, որ եթե վերնախավը համախմբվի և միասին գտնի, որ դա ճիշտ որոշում է, լինեմ ես, թե մեկ ուրիշը, ցանկացած որոշում հնարավոր է, քանի որ ես պատրաստ եմ լինել և՛ կոշկակար իմ ազգի համար, և՛ հավաքարար, և´ ղեկավար»,- ասել է Վարդանյանը։

Նա հավելել է, որ երկիրը ղեկավարել-չղեկավարելու հարցում իր համար պատասխանը շատ պարզ է. «Եթե պատասխանատվություն ստանձնեմ, որ ես նրանցից եմ, ով պատրաստ է պատասխանատվություն ստանձնել Հայաստանի ապագայի համար, այդ թվում՝ ես պետք է պատրաստ լինեմ ցանկացած պաշտոնի, որը կարող է լինել։ Օրինակ՝ դեսպան Գվատեմալայում, եթե դա կարևոր լինի Հայաստանի համար»,- հավելել է Վարդանյանը։–0–