ԵՐԵՎԱՆ, 24 մայիսի. /Նովոստի-Արմենիա/. Ազարտային խաղերի ոլորտում օրենսդրական կարգավորումների խստացումը թելադրված է հասարակության դժգոհությամբ։ Այդ մասին ուրբաթ հայտարարեց վարչապետ Նիկոլ Փաշինյանը խաղային ապարատների օբյեկտների աշխատակիցների բողոքի ակցիայի ժամանակ:
Հայաստանում վերջին ամիսներին խորհրդարանի և կառավարության մակարդակով միջոցներ են ձեռնարկվում`շահումով խաղերի հնարավորություններ տրամադրող օբյեկտների գործունեությունը, ինչպես նաև ազարտային խաղերի գովազդը սահմանափակելու համար: Ինչպես նշում են հայկական ԶԼՄ-ները, նոր իշխանությունների նմանատիպ գործողությունների արդյունքում հազարավոր մարդիկ կամ գործազուրկ կդառնան կամ կկորցնեն եկամտի կայուն աղբյուրը` հաշվի առնելով այն, որ խոսքը ոչ միայն բուքմեյքերական գրասենյակների աշխատակիցների մասին է, այլ նաև իրենց վարձակալությամբ տարածք տրամադրողների:
«Անգամ մինչև վարչապետի պաշտոնում ընտրվելը բազմաթիվ անգամներ լսել եմ մարդկանց դժգողություններն այն մասին, որ բուքմեյքերական գրասենյակները կամ խաղային ապարատներով օբյեկտները սնանկացնում են հայ ընտանիքներին, վնասում են ընտանեկան բյուջեն և հանգեցնում ողբերգական հետևանքների: Օրինակ, Կապանում նման հաստատություններ կարելի է տեսնել գրեթե ամեն բակում: Օրենսդրական կարգավորումները կամ նման գործունեությունը սահմանափակելու որոշումներն առաջարկում են տարբերակներ այս տագնապալի իրավիճակից դուրս գալու համար», - ասաց Փաշինյանը:
Ակցիայի մասնակիցներն առաջարկել են ստեղծել հանձնաժողով, որը կզբաղվի խաղային բիզնեսում ստեղծված իրավիճակով և աշխատանքի ընդհանուր կանոնների մշակման հարցով:
Վարաչպետն ընդունել է կառավարության շենքի մոտ հավաքվածների առաջարկը` կոչ անելով նրանց գրավոր ներկայացնել առաջարկները և փոխանցել դրանք կառավարության աշխատակազմ:
«Անպայման կծանոթանամ ձեր առաջարկներին, և եթե դրանք լինեն հիմնավոր և տրամաբանական, ապա խոստանում եմ դրանք հաշվի առնել», - ասաց նա:
Օրերս ՀՀ վարչապետի խորհրդական Մեսրոպ Առաքելյանը Facebook-ի իր էջում հրապարակել էր տեղեկություն Հայաստանում խաղադրույքների կտրուկ աճի մասին: Նրա տվյալներով, 2018թ.-ին կատարվել է 300 մլրդ դրամի խաղադրույք՝ 2010թ.-ի 14 մլրդ դրամի համեմատ: Այսինքն 8 տարում խաղադրույքների չափն ավելացել է 20 անգամ` հասնելով օրական մոտ 1 մլրդ դրամի:-0-