Փաշինյանն Օնիկ Գասպարյանին մեղադրել է ստի մեջ (ՎԻԴԵՈ)
13:15
14 Ապրիլի 2021
ԵՐԵՎԱՆ, 14 ապրիլի./Նովոստի–Արմենիա/. ՀՀ վարչապետ Նիկոլ Փաշինյանը հերքեց ԳՇ նախկին պետ Օնիկ Գասպարյանի սկանդալային հայտարարությունն այն մասին, որ անհրաժեշտ էր դադարեցնել ռազմական գործողությունները պատերազմի 4–րդ օրը։
«Մենք այս ընթացքում ունեցել ենք թյուրըմբռնումներ, ոմանք՝ հատուկ պլանավորված, ոմանք՝ ակամա և ոչ դիտավորյալ», – ասաց Փաշինյանը։
Վարչապետը մասնավորապես անդրադարձավ ԳՇ նախկին պետ Օնիկ Գասպարյանի՝ նոյեմբերի 17-ի արված հայտարարությանը, երբ վերջինս հայտարարել է, որ պատերազմի չորրորդ օրը ներկայացրել է կորուստները և ԶՈՒ գնահատականը՝ նշելով, որ երկու-երեք օրվա ընթացքում անհրաժեշտ է միջոցներ ձեռնարկել պատերազմը կանգնեցնելու համար։
«Ոզում եմ այս ամբիոնից պատախանատու և պաշտոնապես արձանագրել, որ Օնիկ Գասպարյանի հայտարարության այդ կետը իրականության հետ որևէ աղերս և առնչություն չունի, չի ասել ԳՇ պետը նման բան, դա արձանագրված է պաշտոնապես, այդ թվում ձայնագրությամբ։ Ընդհակառակը՝ սեպտեմբերի 30-ի անվտանգության խորհրդի նիստին ասել է, որ հակառակորդը ոչ մի առաջխաղացում չի ունեցել, բանակը, Զինված ուժերը կատարում են իր առաջ դրված խնդիրը և մինչև վերջ կկատարեն», – ասաց Փաշինյանը։
Նա նաև նշեց, որ ԳՇ պետը չէր կարող նման հայտարարություն անել սեպտեմբերի 30-ին, քանի որ օգոստոսի 21-ին հավաստիացրել է, որ Արցախյան ուղղությամբ կարող ենք առկա ուժերով և միջոցներով, «ոչ մի քայլ հետ» սկզբունքով հետ մղել, ձախողել հակառակորդի հարձակումը և ջախջախել նրա խմբավորումները:
«Սրանք ԳՇ պետի գնահատականներն են օգոստոսի 21–ին և սեպտեմբերի 30–ին։ Սա, սակայն, չի նշանակում, որ Հայաստանի քաղաքական ղեկավարությունը չի ձեռնարկել քայլեր հրադադարի շուտափույթ հաստատման համար», – ասաց Փաշինյանը։
Նա հիշեցրեց, որ ամենաբարձր մակարդակով երեք անգամ ձեռք են բերվել հրադադարի վերաբերյալ պայմանավորվածություններ։
«Բայց հրադադար տեղի չունեցավ Ադրբեջանի պատճառով, որը չպահպանեց Թուրքիայի այն հայտարարությունների ֆոնին, որ նրանք (Ադրբեջանը) չպետք է պահպանեն հրադադարը», – ասաց Փաշինյանը։–0–
