Նախատեսվում են պոլիկլինիկաների աշխատաժամերի փոփոխություններ

ԵՐԵՎԱՆ, 28 դեկտեմբերի./Նովոստի-Արմենիա/. ՀՀ առողջապահության նախարարությունը պացիենտների հարմարավետության համար մտադիր է ավելացնել բուժհաստատությունների աշխատաժամանակը։ Այս մասին հայտարարեց ՀՀ առողջապահության փոխնախարար Արտակ Ջումանյանը լրագրողների հետ հանդիպման ժամանակ։

«Այս պահին 9 աշխատանքային ժամ է՝ 9:00-ից 18:00-ն: Վերջնական որոշում դեռ չկա, բայց նախատեսում ենք փոխել ժամերը, որպեսզի աշխատող հիվանդները 8:00-ից կարողանան այցելել պոլիկլինիկա: Նախատեսում ենք բուժհաստատությունների աշխատանքային օրը սահմանել ժամը 8:00-ից մինչև 19:00-ն»,- ասաց նա։

Նա պարզաբանեց, որ բժիշկների աշխատանքային ժամերը օրական 6 ժամ 36 րոպե են, և այդ ժամերը չեն փոխվի։

«Այս պահին նրանք բուժհաստատությունում աշխատում են 4,5 ժամ, հետո գնում են կանչերի: Փոփոխություններից հետո կանչերից մեկ ժամը հատկացվելու է բուժհաստատությունում հիվանդներին ընդունելուն»,- ասաց նա։

Փոխնախարարը տեղեկացրեց, որ նախատեսվում է ներդնել «հեռահար» բժշկություն, որը կապահովի բժիշկների և հիվանդների օպերատիվ շփումը ձայնային հաղորդագրությունների և տեսազանգերի միջոցով։-0-