Մեր նպատակը ԵՊՀ–ի ՔՊ-ականացման դեմն առնելն է. ԵՊՀ–ում ընթանում է բողոքի ակցիա և ռեկտորի ընտրություններ

ԵՐԵՎԱՆ, 17 դեկտեմբերի./Նովոստի–Արմենիա/. Այսօր ԵՊՀ–ում, փակ դռների հետևում, ընթանում են ռեկտորի ընտրություններ։ Միակ թեկնածուն «Քաղաքացիական պայմանագիր» կուսակցության ներկայացուցիչ Հովհաննես Հովհաննիսյանն է, ով օգոստոսին նշանակվեց ռեկտորի ժամանակավոր պաշտոնակատար։

Ընտրություններին զուգահեռ ԵՊՀ–ում ուսանողների բողոքի ակցիա է, ովքեր դեմ են բուհի քաղաքականացմանը։

Ինչպես նշեց ուսանող Տարոն Մանուկյանը, նրանք կոնկրետ անձի հետ խնդիր չունեն, համակարգի դեմ են պայքարում։

«Այս տարիներին իշխանությունը բոլոր անկախ պետական կառույցները հարմարեցրել է իրեն, որ դառնան իրենց կամակատարը և այդ օրինակը կատարվում է ԵՊՀ–ում`մայր բուհում», – ասաց Մանուկյանը։

Նրա խոսքով, ներկա իշխանությունն ամեն ինչ արեց, որ բուհի հոգաբարձուների խորհրդի կազմը համապատասխանեցվի իրենց և ամեն ինչ ձեռնարկեցին, որ այսօր ունենան ԵՊՀ ռեկտորի մեկ թեկնածու։

«Անկախ այդ անձի քաղաքական հայացքներից, դիրքորոշումներից, այս ընտրությունները օրինական և լեգիտիմ համարել չենք կարող, քանի որ ԵՊՀ հոգաբարձուների խորհրդի նախագահությունում այսօր գտնվում է մի անձ, որին մենք համարում ենք պարտության սիմվոլ, դավաճանական կառավարության կարկառուն ներկայացուցիչներից մեկը, Սուրեն Պապիկյանն է այդ անձը»,–ասաց նա` նշելով, որ որպես մայր բուհի ուսանող չեն կարող լռել և չեն կարող համակերպվել այն մտքի հետ, որ կարող է Պապիկյան Սուրենը այսօր ղեկավարել հոգաբարձուների խորհուրդը և բուհի ապագայի հետ կապված որոշումներ կատարել։

Հիշեցնենք, որ նոյեմբերին ԵՊՀ Հոգաբարձուների խորհրդի նախագահ է ընտրվել Սուրեն Պապիկյանը, ով հիմա զբաղեցնում է պաշտպանության նախարարի պաշտոնը։

«Կարծում եմ, որ ամեն ինչ արվելու է, որ ուսանողի, դասախոսի ազատ խոսքը լռեցնեն։ Մեր նպատակը ԵՊՀ–ի ՔՊ-ականացնելու դեմն առնելն է»,–ասաց Մանուկյանը։

Նա նաև հայտնեց, որ հետագայում ավելի մասշտաբային միջոցառումներ են իրականացնելու։–0–