«Կրակում են ամեն շարժվող բանի վրա». ՀՀ–ում հնարավոր է արգելվի ցանկացած տեսակի որս
ԵՐԵՎԱՆ, 10 մայիսի./Նովոստի–Արմենիա/. ԱԱԾ տնօրեն Արթուր Վանեցյանն առաջարկում է արգելել ցանկացած տեսակի որս։
Վանեցյանը համապատասխան առաջարկն արել է այսօր կայացած կառավարության նիստի ընթացքում, որի ժամանակ քննարկվել ու հավանության է արժանացել «Հայաստանի Հանրապետության քրեական օրենսգրքում փոփոխություններ կատարելու մասին», «Վարչական իրավախախտումների վերաբերյալ ՀՀ օրենսգրքում փոփոխություններ կատարելու մասին» և «Բնապահպանական իրավախախտումների հետևանքով կենդանական և բուսական աշխարհին պատճառված վնասի հատուցման սակագների մասին» ՀՀ օրենքում փոփոխություն կատարելու մասին» օրենքների նախագծերի փաթեթը:
«Ես, լինելով նախկինում շատ ակտիվ որսորդ, արդեն 7 տարի է՝ չեմ գնացել որսի: Եկեք նախաձեռնությամբ հանդես գանք, որսը առհասարակ արգելենք և որսորդական պատրոնների արգելք կիրառենք ժամանակավոր, որովհետև գնում են և անկանոն որս են անում ցանկացած սեզոնի, ցանկացած ժամանակ, և դա վերահսկելը դժվար է»,-ասաց նա:
ՀՀ վարչապետ Նիկոլ Փաշինյանն իր հերթին համաձայնվեց նման որոշման ընդունման անհրաժեշտության հետ։
«Այդ գաղափարը շատ լավ, ճիշտ գաղափար է, բայց մենք պետք է շատ լուրջ ուսումնասիրենք, պետք է բազմակողմանի նայել խնդիրը: Այսօր ամբողջ աշխարհում բնապահպանական հարցերը եկել են առաջին հորիզոնականներ, եթե ոչ առաջին, և մենք պետք է հասկանանք, որ այս առումով ունենք բացառիկ հարստություն, բայց, ցավոք, դրա մի հսկա մասը գտնվում է ոչնչացման եզրին, և պետք է կարողանանք բոլորիս վերաբերմունքն այդ իրավիճակի նկատմամբ փոխել», – ասաց Փաշինյանը։
Նա նաև նշեց, որ արգելքը կարելի է կիրառել վերապահումներով, քանի որ կան պոպուլյացիաներ, որոնք այդքան էլ վատ վիճակում չեն։
«Չնայած, մյուս կողմից, հասկանում եմ ձեր մտահոգությունը, քանի որ մարդիկ կարող են օգտագործել նման սողանցքները, և եթե հրացանով գնան անտառ, ապա կսկսեն կրակել հերթով ամեն ինչի վրա։ Հարկավոր է անցկացնել ուսումնասիրություն և լսել փորձագետների կարծիքը», – ասաց Փաշինյանը։
Այս կապակցությամբ բնապահպանության նախարար Էրիկ Գրիգորյանը նշեց, որ հիմա բարձիթողի վիճակ է, որը հանգերցել է կենդանիների և թռչունների համատարած ոչնչացման։
«Կրակում են ամեն շարժվող բանի վրա։ Կան բազմաթիվ օրենսդրական բացթողումներ, և մենք ևս դիտարկում ենք որսի ժամանակավոր սահմանափակում ներդնելու հնարավորությունը», – նշեց Գրիգորյանը` հավելելով, որ այս հարցով Արաբական Միացյալ Էմիրությունների գործընկերների հետ խորհրդատվությունների ընթացքում պարզվել է, որ նրանց մոտ ավտոմեքենան ևս համարվում է որսի գործիք և առգրավվում է հրացանի հետ միասին։
«Եթե Հայաստանում ևս մի քանի անգամ առգրավվի ավտոմեքենան, ապա դա կարող է դառնալ լուրջ ազդակ անօրինական որսը դադարեցնելու համար», – ընդգծեց Գրիգորյանը։–0–
