ԵՐԵՎԱՆ, 1 փետրվարի./Նովոստի–Արմենիա/. «Քաղաքացիական պայմանագիր» խմբակցության պատգամավոր Արմեն Խաչատրյանն այսօր ԱԺ–ում լրագրողների հետ ճեպազրույցի ժամանակ անդրադարձել է բանակում կենցաղային և զորանոցային հարցերին։
«Եթե սպասենք այն օրվան, երբ պետք է ասենք, որ զորանոցային և կենցաղային բոլոր հարցերը լուծված են, այդպիսի օր չի գալու, որովհետև անընդհատ այդ կենցաղային պայմանները բարելավվելու են, փոփոխվելու են, կատարելագործվելու են։ Այսօր այդ տնակային վիճակները պետք է ավարտին հասցվեն, բավականին լավ տնակներ են պատրաստվում` ամեն ինչով, և անվտանգային հարցերի հետ կապված խնդիրներն են լուծվում, և կացարային պայմանները», – ասաց նա։
Նա թվարկեց, թե ինչ բարեփոխումներ են իրականացվում բանակում։
«Ռազմական նշանակության հարյուրավոր կմ ճանապարհներ են կառուցվում լեռնային և բարձր լեռնային հատվածներում: Ցավոք սրտի, ոչ բոլորին է դա տեսանելի, և այդպես էլ պետք է լինի: Ես այս ճանապարհները տեսել եմ և գոհ ու զարմացած եմ մնացել, թե ինչպես կարելի է նման լեռնային պայմաններում նման աշխատանքներ իրականացնել: Հավատացեք, մենք ինտենսիվ աշխատում ենք այդ բոլոր ուղղություններով, բայց մեզ ժամանակ է պետք»,-ասաց նա:
Լրագրողներինց մեկի դիտարկմանն այն մասին որ ի հայտ են գալիս փաստեր, որ «ժեշտից» կացարաններ են, ցելոֆանապատ վրաններում ու կեղտոտ քնապարկերում են քնում զինվորները, Արմեն Խաչատրյանն ասաց. «Եթե քնապարկը խրամատում է, պետք է կեղտոտ լինի:
«Խրամատը մի պատկերացրեք, որ այնտեղ պետք է սալիկապատված լինի, «Բաքսի» քաշած լինի: Խրամատը հողային շինություն է, որը նախատեսված է պաստպարվելու համար: Այո, կարող և ժեշտից կացարան լինել, բայց որ ասում եք՝ ցելոֆանապատ, վրանային, նման կացարաններ հիմա չկան: Բայց հնարավոր է տակտիկական անհրաժեշտությունից ելնելով որոշակի կարճ ժամանակահատվածում ինչ-որ մի տեղ հայտնվեն մեր ռազմական ուժերի ներկայացուցիչները, մի քանի օր վրան դնեն, որոշակի գործողություն անեն ու գնան: Բայց մշտական տեղակայման վայրերում վրանային ցելոֆանային վիճակներ չկան»,-ասաց նա:–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում