ԵՐԵՎԱՆ, 26 հունվարի./Նովոստի–Արմենիա/. ՀՀ տարածքային կառավարման և ենթակառուցվածքների նախարար Գնել Սանոսյանը հինգշաբթի կառավարության նիստի ժամանակ հայտնեց, որ առաջարկվում են մի քանի նոր ճանապարհային նշաններ։
Դրանցից մեկը անկյունագծային հետիոտնային անցման նշանն է
«Այս նշանն այն դեպքերի համար է, որ այն տեղերում, որտեղ ժամում 900 մարդուց ավելի շարժ կա, այդ դեպքում ճիշտ կլինի կարգավորել, որ 4 կողմից մեքենաները կանգնում են և հետիոտները ոչ միայն ուղիղ, այլև անկյունագծով կարող են անցնել», – ասաց նա։
Նախարարն ընդգծեց, որ կստեղծվեն հատուկ նշաններ էլեկտրամոբիլների, որոշ ծառայությունների համար։
Սանոսյանը նաև նշեց, որ ստեղծվել է մեխանիզմ, որպեսզի տարբեր թույլատրելի արագությամբ ճանապարհների անկյունային խաչմերուկներում, որտեղ շենքեր կան, և վարորդներն ունեն տեսանելիության խնդիր, տեղադրվի «Կանգառ» նշան։
«Կարգավորված են նաև հանրապետական և միջպետական ճանապարհներին «արհեստական անհարթությունների» հետ կապված խնդիրները՝ այսուհետ որոշ դեպքերում, հատկապես դպրոցների և մանկապարտեզների մոտ, թույլատրվում է դրանց տեղադրումը»,- ընդգծեց նա։
Նախարարն ասաց, որ առաջարկվում է հետիոտնային անցումները գծանշել ոչ միայն ասֆալտի վրա գծանշումներով, այլ նաև ճանապարհի վրա տեղադրել հատուկ նշան, որպեսզի գիշերը և վատ տեսանելիության պայմաններում դրանք ավելի տեսանելի լինեն վարորդների համար։-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
