ԵՐԵՎԱՆ, 16 նոյեմբերի./Նովոստի–Արմենիա/. Երևանը դիմում է Մոսկվային` կոչ անելով պաշտպանել ՀՀ սուվերեն տարածքը` 1997թ.–ի երկկողմ պայմանագրի համաձայն։ Այս մասին այսօր հայտարարեց ՀՀ ԱԽ քարտուղար Արմեն Գրիգորյանը Հանրային հեռուստաալիքի եթերում։
«Քանի որ հարձակումը տեղի է ունեցել Հայաստանի սուվերեն տարածքի վրա, 1997թ.–ի պայմանագրի համաձայն` մենք դիմում ենք ՌԴ–ին` կոչ անելով պաշտպանել Հայաստանի տարածքային ամբողջականությունը։ Հիմա պատրաստվում է գրավոր դիմումը», – նշեց նա։
ՀՀ ՊՆ–ի հաղորդմամբ, ժամը 14։30-ի դրությամբ իրադրությունը ՀՀ արևելյան սահմանագոտում շարունակում է ծայրահեղ լարված մնալ։ Ընթանում են տեղային մարտեր, որոնց ընթացքում հակառակորդը կիրառում է հրետանային միջոցներ, զրահատեխնիկա և տարբեր տրամաչափի հրաձգային զինատեսակներ։ Հայկական կողմից իրականացվում են համարժեք գործողություններ։ Իրադրությունը վերահսկվում է ՀՀ զինված ուժերի կողմից։
Ավելի վաղ ՊՆ–ն հաղորդել էր, որ նոյեմբերի 16-ին, ժամը 13։00-ի սահմաններում, ադրբեջանական ԶՈՒ ստորաբաժանումները հերթական սադրանքն են նախաձեռնել ՀՀ արևելյան սահմանագոտու ուղղությամբ՝ գնդակոծության ենթարկելով հայկական դիրքերը։ ՀՀ ԶՈՒ ստորաբաժանումները դիմել են պատասխան գործողությունների՝ հակառակորդի առաջխաղացումը կանխելու նպատակով։–0–
