Ձերբակալվել են Security Dream ընկերության սեփականատերն ու Еllips GA–ի հաշվապահը

ԵՐԵՎԱՆ, 13 օգոստոսի./Նովոստի–Արմենիա/. Իրավապահները երեքշաբթի ձերբակալել են «Security Dream» ՍՊԸ–ի սեփականատերերից մեկին` Ալիկ Զաքարյանին և Еllips GA ընկերության հաշվապահ Սահականույշ Սահակյանին։ Այս մասին «Նովոստի–Արմենիա» գործակալությանը տեղեկացրեց Քննչական կոմիտեի մամուլի քարտուղար Նաիրա Հարությունյանը։

«Քննչական կոմիտեի կողմից ձեռնարկված քննչական միջոցառումների շրջանակում բացահայտվել է առանձնապես խոշոր չափերի խարդախություն, ինչպես նաև փաստաթղթերի կեղծում։ Զաքարյանն ու Սահակյանը ձերբակալվել են», – նշեց Հարությունյանը։

Նրա խոսքով, ձերբակալվածներին մեղադրանք է առաջադրվել է ՀՀ ՔՕ 178–րդ հոդվածի 3–րդ մասի 1–ին կետի (Խարդախությունը) և 325–րդ հոդվածի 2–րդ մասի (Փաստաթղթեր, դրոշմներ, կնիքներ, ձևաթղթեր, տրանսպորտային միջոցների հաշվառման համարանիշներ կեղծելը, իրացնելը կամ օգտագործելը) հատկանիշներով:

Ավելի վաղ հայտնի էր դարձել , որ ոստիկանության կազմակերպված հանցավորության դեմ պայքարի գլխավոր վարչության Կոռուպցիայի և տնտեսական հանցագործությունների հակազդման վարչությունում տեղեկություններ էին ստացվել, որ «Security dream» ՍՊԸ–ի տնօրինությունը չարաշահումներ է թույլ տվել։ Նախապատրաստված նյութերով պարզվել է, որ 2011, 2013 և 2017 թթ.–ին Ճանապարհային ոստիկանության և «Security dream»–ի միջև պետության կարիքների համար երթևեկության նկատմամբ վերահսկողության համակարգեր գնելու և ծառայություններ մատուցելու վերաբերյալ պայմանագրեր են կնքվել։ 

Ըստ «Security dream»–ի ներկայացրած հաշվետվությունների, նախնական տվյալներով պարզվել է նաև, որ ստեղծված համակարգերի սպասարկում իրականացնելու համար «Security dream»–ը պայմանագիր է կնքել «Ellips GA» ՍՊԸ–ի հետ դրամական միջոցներ հափշտակելու դիտավորությամբ։ Մասնավորապես, նախորդ տարի կնքված պայմանագրով 2017 թ.–ի փետրվարից 2018 թ.–ի հունիս կազմվել են փաստացի չմատուցված ծառայությունների վերաբերյալ կեղծ կատարողական ակտեր, որոնց հիման վրա կազմված կեղծ հաշվետվությունները ներկայացվել են ՃՈ։ Արդյունքում, «Security dream» և «Ellips GA» ընկերությունների տնօրինությունը հափշտակել է շուրջ 1․015․869․600 դրամ։  

ՀՀ ոստիկանության կազմակերպված հանցավորության դեմ պայքարի գլխավոր վարչության աշխատակիցները (6–րդ բաժին) 2018թ.–ի հունիսի 20–ին հատուկ օպերացիա էին իրականացրել «Security Dream» ՍՊԸ–ի գրասենյակում։

2019թ.–ի մարտին հաստատվել է, որ «Security Dream» ՍՊԸ–ի սեփականատերերը յուրացրել են 43 մլն դրամ (մոտ 81 հազար դոլար) ՃՈ–ի կողմից ամսական տրամադրվող 70 մլն դրամից (մոտ 143 հազար դոլար)։

«Security Dream» ընկերությունը տեղադրում և սպասարկում է ՀՀ–ում ավտոմեքենաների երթևեկությունը կարգավորող արագաչափեր և տեսախցիկներ։–0–