«Այս պահին համարում ենք մեր պահանջների հիմնական մասը բավարարված»․ Սաղաթելյանը՝ ոստիկանապետի հետ հանդիպման արդյունքների մասին

ԵՐԵՎԱՆ, 18 մայիսի./Նովոստի-Արմենիա/. Ոստիկանապետի հետ հանդիպումից հետո ընդդիմության ներկայացուցիչ Իշխան Սաղաթելյանը հայտարարել է՝ ներկայացված պահանջների հիմնական մասը բավարարված է, հաղորդում է aysor.am-ը։

Ապօրինություններ կատարած, անհամաչափ ուժ գործադրած ոստիկաններին խոստացել են պատասխանատվության ենթարկել։

«Ոստիկանապետը մեզ փոխանցեց, որ մեկ հոգու գործունեություն այս պահին արդեն կասեցվել է, 37 հոգու նկատմամբ նշանակվել է ծառայողական քննություն, հարուցվել են մեկ տասնյակից ավելի քրեական գործեր, և այսօրվա դեպքերով տեղի է ունենում ուսումնասիրություն։ Ոստիկանությունը շատ կարճ ժամկետում հանդես կգա կոնկրետ հայտարարությամբ՝ կոնկրետ դեպքերով»,- ասել է Իշխան Սաղաթելյանը։

Նա նաև տեղեկացրել է՝ ավտոերթերի մասնակիցների 80-ից ավելի ավտոմեքենաները, որոնք հատուկ պահպանվող տարածք էին տեղափոխվել և չէին վերադարձվում, վերադարձվելու են։

«Մենք նաև շատ հստակ ոստիկանությանը փոխանցել ենք, որ անցնող 2 օրվա ընթացքում անհամաչափ և բռնի ուժ է կիրառվել մեր քաղաքացիների նկատմամբ։ Որևէ կերպ դա չի կարող կասեցնել մեր պայքարը։ Մենք կոչ ենք արել, որ վերջ տրվեն նման գործողություններին, և հուսով եմ՝ ոստիկանությունն ըմբռնումով է վերաբերվելու բոլորիս կոչին»,- նշել է ընդդիմադիր գործիչը։

Իշխան Սաղաթելյանը հավելել է՝ թեպետ պահանջների հիմնական մասը բավարարված են համարում, բայց բոլոր դեպքերով լինելու են հետևողական և սպասելու են կոնկրետ արդյունքների։-0-