Զինված խմբի անդամները բացահայտել են, թե ով պետք է պայթեցներ Սերժ Սարգսյանի ինքնաթիռը. նոր մանրամասներ

ԵՐԵՎԱՆ, 17 մարտի./Նովոստի–Արմենիա/. Անցած տարվա նոյեմբերի 25-ին Նորք-Մարաշում գտնվող տներից մեկում ՀՀ ազգային անվտանգության ծառայության աշխատակիցների կողմից ձերբակալված «հանցավոր» խմբի գործով նախաքննությունն արդեն շարունակվում է 3,5 ամիս:

Երևանում վնասազերծված հանցախմբի թիրախը կարող էին լինել խորհրդարանն ու վարչապետը>>

Ինչպես գրում է «Ժողովուրդը», այս ընթացքում գործով անցնող բոլոր մեղադրյալները, կարելի է ասել, ամեն ինչ պատմել են իրավապահներին, այդ թվում նաև թե խմբի անդամներից ում ինչ գործառույթ է վերապահված եղել:

Թերթը պարզել է, սակայն, որ մինչ օրս ցուցմունք չտված եզակի մեղադրյալներից մեկը 2015 թվականի դեկտեմբերի 6-ին կալանավորված ազատամարտիկ, 49-ամյա Հարություն Սարիբեկյանն է՝ Զիմ մականունով: Նա պնդում է, որ ինքը խմբի անդամներին չի ճանաչում ևր գործի հետ կապ չունի:

Նորք-Մարաշում վնասազերծված խմբի գործով հրամանատարներ են ձերբակալվել>>

Փոխարենը գործով անցնող մյուս մեղադրյալների ցուցմունքների մի մասը հենց նրա դեմ է ուղղված: Մասնավորապես, ըստ նույն լուրերի՝ մեղադրյալներից 5-ը ԱԱԾ քննիչներին ասել են, որ իրենք ծրագրած են եղել պայթեցնել Սերժ Սարգսյանի ինքնաթիռը, և որ իբր այդ գործառույթը հանձնարարված է եղել հենց Հարություն Սարիբեկյանին, գրում են հոդվածի հեղինակները։ 

ՀՀ ազգային անվտանգության ծառայությունը նախորդ տարվա նոյեմբերի 25–ին տեղեկացրել էր 19 հոգուց բաղկացած զինված հանցախմբի վնասազերծման մասին, որի նպատակն էր կազմակերպել մի շարք ծանր հանցագործություններ հանրապետության տարածքում։

Հանցախմբի անդամների կողմից վարձակալած տան խուզարկության ընթացքում հայտնաբերվել էին տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր և պայթուցիկ սարքեր, կապի միջոցներ, փամփուշտներ, փամփշտակալներ, ռազմական հանդերձանք, այդ թվում` զրահաբաճկոններ: –0–