Արևմտահայերենի ուսուցման պիլոտային ծրագիր կարող է ներդրվել Հայաստանի դպրոցներում

ԵՐԵՎԱՆ, 21 փետրվարի. /Նովոստի–Արմենիա/. Հայաստանի դպրոցներում, հնարավոր է, արևմտահայերենի ուսուցման պիլոտային ծրագիր ներդրվի, չորեքշաբթի ասաց ՀՀ ԿԳՆ Լեզվի պետական տեսչության ղեկավար Սերգո Երիցյանը։

«Մեր գերատեսչությունն արդեն ներկայացրել նախաձեռնությունը ԿԳ նախարարի հավանությանը։ Հարցն ուսումնասիրման փուլում է։ Եթե որոշում ընդունվի, ապա պիլոտային ծրագիրը կներդրվի Հայաստանի մի քանի դպրոցներում», – տեղեկացրեց Երիցյանը։

Նա նաև նշեց, որ քննարկվում են այդ դիսցիպլինի ներդրման հետ կապված տեխնիկական հարցեր։

«Հարկավոր է կողմնորոշվել գրականության հարցում, որոշել, թե որ դասարանից աշակերտները կարող են սկսել ուսումնասիրել այս դիսցիպլինը, քանի որ ակնհայտ է, որ դա չպետք է արվի առաջին դասարանցիների համար։ Երբ այս և մի շարք այլ հարցեր կարգավորվեն, մենք կկարողանանք պաշտոնապես հայտարարել պիլոտային ծրագրի մեկնարկի մասին», – ասաց Երիցյանը։

Արևմտահայերենը ժամանակակից հայերենի երկու ճյուղերից մեկն է, որով խոսում է սփյուռքահայության մեծ մասը (գլխավորապես Հյուսիսային Ամերիկայի, Եվրոպայի և Մերձավոր Արևելքի հայությունը՝ բացառությամբ իրանահայերի)։ Ձևավորվել է 19-րդ դարի սկզբին։–0–