ԵՐԵՎԱՆ, 30 հոկտեմբերի./Նովոստի–Արմենիա/. Ամերիաբանկի և Amazon Web services-ի համագործակցության շրջանակում Երևանում չորեքշաբթի անցկացվում է ScaleUp ինովացիոն ֆորումը, որին մասնակցում են այնպիսի խոշորագույն ընկերությունների փորձագետներ, ինչպիսիք են AWS–ն, VISA–ն, Middleware–ը, Mambu–ն և Softprom–ը։
Ֆորումի շրջանակում AWS–ի ԱՊՀ–ի գծով տարածքային մենեջեր Վերոնիկա Ռոմանովսկայան ներկայացրել է Amazon–ի նորարարական մոտեցումները։
«Մեզ մոտ Amazon–ում ներդրված է օգնության մեծ համակարգ, որը հիմնված է արհեստական բանականության վրա։ Այն, իհարկե, անտեսանելի է մյուսների համար, սակայն դրա օգնությամբ մենք կարողանում ենք հասկանալ, թե ինչ կարիքներ ունի շուկան։ Արհեստական բանականության օգնությամբ մենք կարողանում ենք բավարարել այդ պահանջարկը։ Դա օգնում է մեզ միշտ պահպանել առաջատարի դիրքերը», – ասաց նա։
Ռոմանովսկայայի խոսքով, Amazon–ի առաքելությունն է դառնալ ընկերություն, որը տրամադրում է ամենահաճախորդամետ ծառայությունները։
«Սա մեր մեկնարկային դիրքորոշումն է` հասկանալ հաճախորդի մտահոգությունը։ Կան նմանատիպ բազմաթիվ կետեր, որոնց վրա մենք կարող ենք կենտրոնանալ։ Շատերը կենտրոնանում են տեխնոլոգիաների, մրցակցության վրա։ Մենք Amazon–ում հիմնականում կենտրոնացած ենք հենց հաճախորդների վրա», – նշեց տարածքային մենեջերը։
Նա հայտարարեց, որ հաջողության հասնելու համար ընկերությունում պետք է լինի նորարարությունների մշակույթ, այն պետք է լինի հաճախորդամետ և ուշադրություն դարձնի մանրուքներին։
«Ինովացիոն մշակույթը պետք է լինի թիմի յուրաքանչյուր մասնակցի մտածողության մեջ, սակայն պետք է նաև ունենալ համբերություն։ Պետք է անցկացնել թեստավորում, անհաջողությունները նորմալ են, պետք չէ վախենալ դրանցից։ Հարկավոր է պատրաստ լինել, որ ինչ–որ աշխատանք ստիպված ես լինելու կատարել երկար ժամանակ», – ասաց Ռոմանովսկայան` նշելով, որ երբ 2006թ.–ին գործարկվեց AWS–ը շատերը երկար ժամանակ չէին հասկանում, թե ինչի համար է պետք այս ծառայությունը։
Միաժամանակ Amazon–ի ներկայացուցիչը նշեց, որ ընկերությունն ունի բազմաթիվ մոդելներ և հայեցակարգեր, և եթե սկսում ես հասկանալ, որ ինչ–որ բան տասը տարում չի փոխվի, ապա դա հայտնվում է աշխատանքի հիմքում։
«Օրինակ, հաճախորդները չեն ուզում գնել թանկարժեք ապրանքներ, չեն ցանկանում օգտվել դանդաղ տրամադրվող ծառայություններից», – նշեց նա։
Ռոմանովսկայան նաև հայտարարեց, որ գաղափարն իրագործելու համար հարկավոր է ունենալ ինովացիոն տրամադրվածություն, իսկ նորարարությունները ներդնելու համար պետք է մշակվեն հստակ մեխանիզմներ և սահմանվի հասկանալի ճարտարապետություն։
««Ճարտարապետների» ժամանակի մոտ 70%–ը ծախսվում է հասկանալու համար, թե ինչպիսի վերջնական տեսք է ստանալու կոնկրետ ծառայությունը կամ ապրանքը և արդյոք այն կհասնի նախագծում նշված մակարդակին», – ասաց նա։
Ռոմանովսկայան նաև ուշադրություն դարձրեց անհաջողություններին` նշելով, որ չարժե դրանցից վախենալ։ Նա բերեց Amazon Fire Phone–ի օրինակը, որը կատարյալ ձախողում էր, չնայած ծախսած 70 մլն դոլարին։ Այս համատեքստում նա կարևորեց սխալների վրա աշխատանքն ու հաճախորդների հետ մշտական կապի պահպանումը։
Amazon Web Services–ն (AWS) աշխարհում մեծ տարածում գտած ամպային հարթակներից է, որն ունի բավականին լայն հնարավորություններ։ Amazon Web Services–ը տրամադրում է 165 բազմաֆունկցիոնալ ծառայություններ տվյալների մշակման կենտրոնների համար։ 2018թ.–ի արդյունքում, AWS ծառայությունից ստացված Amazon–ի տարեկան հասույթը կազմել է 25,6 մլրդ դոլար, իսկ մաքուր եկամուտը` 7,6 մլրդ դոլար։
«Ամերիաբանկ» ՓԲԸ–ն Հայաստանի դինամիկ զարգացող բանկերից է և դասվում է երկրի ամենակայուն և խոշոր ֆինանսական հաստատությունների շարքին: Այն Հայաստանում առաջին ներդրումային բանկն է և սկսած 2007թ-ից տրամադրում է նորարարական բանկային ծառայությունների լայն տեսականի: 2018թ.–ի արդյունքում Ամերիաբանկը Հայաստանի բանկային հատվածի առաջատարն է բոլոր հիմնական ցուցանիշներով (ակտիվներ, պարտավորություններ, վարկային պորտֆել, մաքուր եկամուտ և կապիտալ)։–0–
