Վրաստանը հայկական ավտոմեքենաներին կտրամադրի ժամանակավոր, այլընտրանքային հաղորդակցություն Դարիալի կիրճով. ԱԻՆ

ԵՐԵՎԱՆ, 4 հուլիսի. /Նովոստի–Արմենիա/. Վրաստանը հայկական ավտոմեքենաներին կտրամադրի ժամանակավոր, այլընտրանքային հաղորդակցություն Դարիալի կիրճով, երկուշաբթի հաղորդեցին ՀՀ ԱԻՆ մամուլի ծառայությունից։

Ռուս–վրացական սահմանի Վերին Լարս անցակետով է անցնում Հայաստանը Ռուսաստանին կապող ցամաքային միակ ճանապարհը։ Այս ուղղությունը փակվել է հունիսի 23–ին անցակետից 2 կմ հեռավորության վրա տեղի ունեցած քարաթափից հետո, որտեղ Տերեկ գետի վարարման հետևանքով 500-600 մ հատվածն ամբողջովին փլուզվել է։ Անվտանգության նկատառումներից ելնելով` այդ հատվածը երթևեկության համար փակվել է։

Վերին Լարսի անցակետը փակ կլինի ևս 10 օր>>

«ՀՀ ԱԻՆ ճգնաժամային կառավարման ազգային կենտրոնն այսօր կապ է հաստատել Վրաստանի ՆԳՆ ԱԻ դեպարտամենտի տնօրենի տեղակալ Կախա Թերթվաձեի հետ, որի հաղորդմամբ` հուլիսի 4-ին, ժամը 17:00-ին Դարիալում ժամանակավորապես կբացվի ավտոճանապարհ 4×4 թեթև մարդատար մեքենաների համար, հատուկ ռեժիմով՝ ՆԳՆ հսկողությամբ», – նշվում է հաղորդագրության մեջ։

Հունիսի 23-ից սկսած ՀՀ ԱԻ նախարարությունը ստեղծված իրավիճակի մասին տեղեկատվական բոլոր խողովակներով պարբերաբար իրազեկել և զգուշացրել է բնակչությանը Լարսի անցակետի փակման մասին` հորդորելով օգտվել այլընտրանքային ճանապարհներից:

ՀՀ ԱԻՆ–ի տվյալներով` Լարսի անցակետի մոտ ծավալված ժամանակավոր ճամբարներում գրանցված բոլոր ՀՀ քաղաքացիները ՌԴ ԱԻՆ օդանավով տեղափոխվել են Հայաստան:–0–