Ռուսաստանում ՀՀ քաղաքացի է ձերբակալվել դրամանենգության կասկածանքով

ԵՐԵՎԱՆ, 4 դեկտեմբերի. /Նովոստի–Արմենիա/. ՌԴ ՆԳՆ աշխատակիցները Մոսկվայում ձերբակալել են  կազմակերպված հանցախմբի մասնակիցների, որոնք կասկածվում են դրամանենգության մեջ։

Հանցախմբի մասնակիցներից մեկը Հայաստանի քաղաքացի է։

ՌԴ ՆԳՆ Տնտեսական անվտանգության և կոռուպցիայի հակազդման գլխավոր վարչության աշխատակիցները, ՌԴ ԱԴԾ–ի մասնակցությամբ, իրականացրել են հատուկ օպերացիա և կանխել կազմակերպված հանցախմբի անօրինական գործողությունները, որի մասնակիցները կասկածվում են հինգ հազար ռուբլի անվանական արժեքով կեղծ թղթադրամներ պատրաստելու, պահելու և իրացնելու մեջ», –, հաղորդում է ՏԱՍՍ–ը` հղում անելով ՌԴ ՆԳՆ–ի մամուլի ծառայությանը։

Հաղորդագրության մեջ նշվում է, որ ձերբակալվել են հանցախմբի կազմակերպիչներն ու առավել ակտիվ մասնակիցները, որոնցից մեկը ՀՀ քաղաքացի է։

Կասկածյալների բնակության վայրերում իրականացվել է 10 հետախուզում, առգրավվել են հինգ հազար ռուբլի անվանական արժեքով բարձրորակ կեղծ թղթադրամներ, որոնց ընդհանուր գումարը կազմել է 2,5 մլն ռուբլի, բջջային հեռախոսներ, SIM քարտեր, համակարգչային սարքավորումներ, ինչպես նաև կեղծ թղթադրամների պատրաստման համար օգտագործվող նյութերը։

Օպերատիվ աշխատողները տեղեկություններ են ստացել խմբի կառուցվածքի, կազմակերպիչների և ակտիվ մասնակիցների, ինչպես նաև կեղծ թղթադրամների իրացման միջոցների մասին։ Հավաքված նյութերի հիման վրա հարուցվել է քրեական գործ ՌԴ ՔՕ–ի «Կեղծ թղթադրամի կամ արժեթղթերի պատրաստում, պահպանում, տեղափոխում կամ իրացման» հոդվածի հատկանիշներով։ Որոշվում է նրանց նկատմամբ խափանման միջոց ընտրելու հարցը։–0–