ԵՐԵՎԱՆ, 1 մայիսի. /Նովոստի–Արմենիա/. Ընդդիմության առաջնորդ Նիկոլ Փաշինյանը կոչ արեց վաղվանից սկսել բողոքի տոտալ ակցիաներ հանրապետության ողջ տարածքում։
ՀՀ ԱԺ–ն երեքշաբթի հատուկ նիստում մերժեց Փաշինյանի թեկնածությունը վարչապետի պաշտոնում։ Փաշինյանի թեկնածության օգտին քվեարկեց 45 պատգամավոր, սակայն անհրաժեշտ էր 53 ձայն։
«Վաղն առավոտյան ժամը 8։15–ից կարգելափակվեն բոլոր ճանապարհները, մայրուղիները, այդ թվում` միջպետական, մետրոպոլիտենը, օդանավակայանները, երկաթուղիները, ողջ հաղորդակցությունը, այն ամենն, ինչ կարող է արգելափակվել», – հայտարարեց Փաշինյանը Երևանում հանրահավաքի ժամանակ։
Նա կոչ արեց նաև հայտարարել տոտալ դասադուլ և գործադուլ կրթական հաստատություններում և այլ գերատեսչություններում։
Փաշինյանը տեղեկացրեց նաև, որ վաղը երեկոյան ժամը 19։00–ին Հանրապետության հրապարակում կանցկացվի հերթական հանրահավաքը։
Նրա խոսքով, ներքաղաքական իրավիճակի շուրջ բանակցությունները կարող են տեղի ունենալ միայն ՀՀԿ–ի` իշխանությունը հանձնելու շուրջ։
«Որևէ նահանջ չի լինելու։ Մենք կշարունակենք Հայաստանի ազատագրումը սանտիմետրը սանտիմետրի հետևից...Մեր հաղթանակն արձանագրել է նոր Հայաստանի ծնունդ, որտեղ ողջ իշխանությունը պատկանում է ժողովրդին», – հայտարարեց նա։
Փաշինյանը կոչ արեց իրավապահ ուժերի աշխատակիցներին միանալ բողոքի ցույցերին։ Նա նաև շնորհակալություն հայտնեց «Ծառուկյան» դաշինքին, ՀՅԴ–ին և «Ելք» դաշինքին ԱԺ–ում իր թեկնածությանն աջակցելու համար։
«Այսօր ՀՀԿ խմբակցությունը դրսևորեց իր պրովոկացիոն էությունը։ Նրանք ուզում էին, որպեսզի ժողովրդի թեկնածուն գնա պրովոկացիաների և հունից դուրս գա։ Սակայն չստացվեց», – ասաց նա` հայտարարելով, որ իշխող կուսակցությունը ստիպված կլինի ճանաչել ժողովրդի միակ թեկնածուի ընտրությունը։
Ըստ ՀՀ Սահմանադրության, վարչապետ չընտրելու դեպքում քվեարկությունից հետո յոթ օր անց կազմակերպվում են կառավարության ղեկավարի նոր ընտրություններ։ Ընտրություններին մասնակցելու իրավունք ունեն պատգամավորների ընդհանուր թվի առնվազն մեկ երրորդի կողմից առաջադրված թեկնածուները։ Եթե վարչապետը չընտրվի պատգամավորների ընդհանուր թվի ձայների մեծամասնությամբ, ապա ԱԺ–ն ցրվում է։–0–