Կարեն Կարապետյանը ցանկանում է ազատվել կառավարության աշխատակազմի ղեկավար-նախարար Դավիթ Հարությունյանից

ԵՐԵՎԱՆ, 4 հոկտեմբերի. /Նովոստի–Արմենիա/. ՀՀ վարչապետ Կարեն Կարապետյանը ցանկանում է ուշ թե շուտ ազատվել կառավարության աշխատակազմի ղեկավար-նախարար Դավիթ Հարությունյանից, գրում է «Հայկական ժամանակը»։

Այս 3 շաբաթներին նա ընդհանրապես չի երևում վարչապետի կողքին։

«Փոխարենը Կարապետյանն այժմ ակտիվորեն շփվում է փոխվարչապետ Վաչե Գաբրիելյանի հետ, որը կառավարության նիստերի ժամանակ նստում է վարչապետի կողքին», – գրում են հոդվածի հեղինակները։

Թերթի հաղորդմամբ, նախկին վարչապետ Հովիկ Աբրահամյանի կողքին թե ԱԺ-ում կառավարության հետ հարցուպատասխանի ժամանակ, թե կառավարության նիստերին միշտ Հարությունյանն էր նստում, թեև ի պաշտոնե դա Վաչե Գաբրիելյանի տեղն էր։

Իշխանական կուլիսներում խոսվում է, որ Կարապետյանն ի սկզբանե է ցանկացել ազատել Հարությունյանին, բայց քանի որ Ընտրական օրենսգրքի փոփոխությունների շուրջ բանակցությունները համակարգել է Հարությունյանը և պետք է ավարտին հասցնի, նա դեռ պետք է պաշտոնավարի։ Բացի այդ, նրան, նաև Արփինե Հովհաննիսյանին դեռ չազատելու համար Կարապետյանին խնդրել է նաև Հովիկ Աբրահամյանը, գրում է թերթը։–0–