ԵՐԵՎԱՆ, 7 օգոստոսի./Նովոստի–Արմենիա/. Ժիրայր Սեֆիլյանի վերաբերյալ քրեական գործերով քննությունը կիրականացնի հատուկ քննչական ծառայությունը:
Բացառված չէ, որ դրանք միացվեն մեկ վարույթում, գրում է pastinfo–ն։
Խոսքը 2015 և 2016 թվականներին հարուցված քրեական գործերի մասին է։
Ավելի վաղ հաղորդվել էր, որ 2015 թվականի ապրիլին քրեական գործ է հարուցվել՝ Հայոց ցեղասպանության 100-րդ տարելիցի առթիվ 2015թ. ապրիլի 24-ին Հայաստանի Հանրապետության տարածքում նախատեսված համազգային հրապարակային միջոցառումների ընթացքում զանգվածային անկարգություններ նախապատրաստելու դեպքի առթիվ։ ՀՀ քննչական կոմիտեն հայտարարեց, որ ՀՀ ազգային անվտանգության ծառայության հետ համատեղ ձեռնարկած միջոցառումների արդյունքում կանխվել է զանգվածային անկարգությունների կազմակերպումը:
Այս քրեական գործի շրջանակում մեղադրանքներ առաջադրվեցին մի շարք անձանց, նրանց թվում՝ Վարուժան Ավետիսյանին, Պավել Մանուկյանին, Գևորգ Սաֆարյանին, Ժիրայր Սեֆիլյանին, Գարեգին Չուգասզյանին՝ ՀՀ քրեական օրենսգրքի 35-225-րդ հոդվածի 1-ին մասով։ Բոլորն էլ կալանավորվեցին, իսկ ապրիլի 24-ից հետո ազատ արձակվեցին։
Երկրորդ գործը վերաբերում է մի խումբ անձանց կողմից նախնական համաձայնությամբ ապօրինի կերպով զենք, ռազմամթերք ձեռք բերելու, պահելու, փոխադրելու դեպքի առթիվ հարուցված քրեական գործին։
Իսկ այս տարի մայիսի 20-ին Ծիծեռնակաբերդի խճուղու սկզբնամասում ճանապարհատրանսպորտային պատահար էր տեղի ունեցել և դեպքի վայրում հայտնաբերվել էին Ժիրայր Սեֆիլյանի կազմակերպմամբ խմբի կողմից ապօրինի կերպով շրջանառվող երկու միավոր զենքն ու ռազմամթերքը:
Ավելի ուշ Քննչական կոմիտեն պաշտոնական հաղորդագրություն տարածեց, որում նշվում էր՝ օպերատիվ-հետախուզական մեծածավալ միջոցառումների արդյունքում պարզվել է, որ Ժիրայր Սեֆիլյանը մի խումբ անձանց հետ ծրագրել էր զինված խմբավորումների միջոցով, զենքի գործադրմամբ, զավթել շենքեր, շինություններ, հաղորդակցության և կապի միջոցներ, ինչի նպատակով էլ վերջինս կազմակերպել է մի խումբ անձանց կողմից ապօրինի կերպով զենք և ռազմամթերք ձեռք բերելը, փոխադրելը և տարբեր վայրերում դրանք ապօրինի կերպով պահելը:
Ընդ որում, խմբի անդամները որոշ հանցավոր գործողություններ ծրագրել էին իրականացնել ապրիլյան պատերազմին հաջորդող ժամանակահատվածում:
Հունիսի 22-ին Սեֆիլյանին մեղադրանք առաջադրվեց ՀՀ քրեական օրենսգրքի 235-րդ հոդվածի 2-րդ մասով և կալանավորվեց։
Նշված քրեական գործի շրջանակներում որպես մեղադրյալ է ներգրավվել 9 անձ, որոնց թվում՝ Ժիրայր Սեֆիլյանը։ Նրանցից մեկի գտնվելու վայրն անհայտ է, և նրա նկատմամբ հայտարարվել է հետախուզում։
«Փաստինֆո»-ի տեղեկություններով՝ այս երկու քրեական գործերն օրեր առաջ ՔԿ-ն ուղարկել է դատախազություն, որն էլ այն, թերևս, պետք է ուղարկի ՀՔԾ՝ հետագա նախաքննությունը շարունակելու։–0–
