ԵՐԵՎԱՆ, 25 փետրվարի. /Նովոստի-Արմենիա/. Ղարաբաղ այցելելու համար Բաքվի կողմից միջազգային հետախուզման հայտարարված Եվրախորհրդարանի անդամները Ինտերպոլի հաշվառումներով չեն անցնում, հաղորդել է նախօրեին ՀՀ գլխավոր դատախազությունը՝ հղում անելով Հայաստանի Հանրապետության ոստիկանության Ինտերպոլի ԱԿԲ-ից ստացված տեղեկատվությանը:
Ադրբեջանի գլխավոր դատախազությունը ավելի վաղ հայտնել է, որ փետրվարի 22-ին միջազգային հետախուզում է հայտարարել Եվրախորհրդարանի պատգամավորներ Ֆրանկ Էնգելի (Լյուքսեմբուրգ), Էլենի Թեոխարուսի (Կիպրոս) և Յարոմիր Շտետինայի (Չեխիա) հանդեպ՝ Լեռնային Ղարաբաղում փետրվարի 20-ին տեղի ունեցած սահմանադրական հանրաքվեն մոնիթորինգ անելու համար:
«Հայաստանի Հանրապետության ոստիկանության Ինտերպոլի ԱԿԲ-ից ստացված տեղեկատվության համաձայն՝ Ֆրանկ Էնգելը, Էլենի Թեոհարուսը և Յարոմիր Շտետինան Ինտերպոլի հաշվառումներով չեն անցնում և միջազգային հետախուզման մեջ չեն գտնվում», - նշվում է հաղորդագրության մեջ:
Մամուլի քարտուղարությունից ընդգծել են, որ հանձնման հետ կապված հարաբերությունները կարգավորող միջազգային պայմանագրերով ուղղակիորեն նախատեսված է էթնիկ պատկանելիության կամ քաղաքական հայացքների համար անձին հետապնդելու համար հանձնելու անթույլատրելիությունը: Նույն հիմքերով բացառվում է նաև անձանց միջազգային հետախուզումը:
«Այդ մասին ուղղակի արձանագրված է նաև Քրեական ոստիկանության միջազգային կազմակերպության (Ինտերպոլ) Կանոնադրության 3-րդ հոդվածում, որի համաձայն՝ կազմակերպությանը խստիվ արգելվում է որևէ գործունեություն ծավալել կամ միջամտել քաղաքական, զինվորական, կրոնական, ռասայական բնույթ կրող գործերին և հարցերին», - նշվում է հաղորդագրության մեջ:
Հաղորդագրության համաձայն, ՀՀ գլխավոր դատախազության կողմից միջոցներ են ձեռնարկվել Ադրբեջանի Հանրապետության կողմից նմանատիպ գործերով (մասնավորապես, Լեռնային Ղարաբաղ այցելած անձանց նկատմամբ Ադրբեջանի քրեական օրենսգրքի 318 հոդվածով հարուցված քրեական գործերով) անձանց նկատմամբ միջազգային հետախուզում հայտարարելու մասին հարցումներ ստանալիս դրանց ընթացք չտալու, նշված անձանց հետախուզման վերաբերյալ տվյալները Ինտերպոլի համապատասխան պահոցներում չներառելու և դրանց կապակցությամբ Ինտերպոլի ուղիներով որևէ համագործակցություն չիրականացնելու նպատակով Ինտերպոլի գլխավոր քարտուղարությանը իրազեկելու ուղղությամբ՝ այդ գործերով քրեական հետապնդումների քաղաքական, էթնիկ բնույթի մանրամասն պարզաբանմամբ:
«Ինչ վերաբերվում է ԱՊՀ շրջանակներում անձանց նկատմամբ միջպետական հետախուզում հայտարարելու ընթացակարգերը կարգավորող փաստաթղթերին, ապա դրանցում նման երաշխիքներ նախատեսված չեն», - նշվում է հաղորդագրության մեջ: Միաժամանակ նշվում է, որ ՀՀ Գլխավոր դատախազի կողմից միջոցներ են ձեռնարկվել ԱՊՀ շրջանակներում անձանց նկատմամբ հետախուզում հայտարարելու ընթացակարգերում նման հիմքերով հետախուզումը բացառող երաշխիքների ամրագրմանն ուղղված աշխատանքներ նախաձեռնելու կապակցությամբ: -0-
