ԵՐԵՎԱՆ, 18 փետրվարի. /Նովոստի–Արմենիա/. Եթե բոլորովին վերջերս Ջոն Տրավոլտայի անունը տալիս երևակայության մեջ միանգամից երևան էր գալիս «Քրեական ընթերցվածքի» նրա հայտնի պարը, ապա այսօր` կողքերը կարկամած նայող և ոչինչ չհասկացող հոլիվուդյան դերասանի մեմը։ Եվ դա մեծացրեց նրա ճանաչելիությունը։ Այսօր` փետրվարի 18–ին, «Բրիլիանտինա»–ի աստղը դառնում է 62 տարեկան, և տոնի առթիվ «Կոմսոմոլսկայա պրավդան» որոշել է նրա մասին քիչ հայտնի հինգ փաստեր ներկայացնել։
1. Ջոն Տրավոլտան չունի կրթություն, բացի օդաչուի դասընթացներից։ Հանուն պարերի Տրավոլտան մի ժամանակ թողել է դպրոցը և գեթ մեկ անգամ դրա համար չի ափսոսացել։ «Շաբաթ երեկոյան տենդը» ֆիլմում պարողի դերը նրան մի ակնթարթում աստղ դարձրեց։ Դիսկո ոճի կրակոտ պարերը և անկրկնելի քայլվածքը BeGees խմբի Staying Alive–ի ներքո գերեցին հեռուստադիտողների սրտերը և երիտասարդաին բերեցին «Օսկարի» առաջին անվանակարգը տղամարդու լավագույն դերի համար։
2. Ջոն Տրավոլտան ավելի քան 10 տարի բուժվում է ալկոհոլիզմից։ Սպիրտայինի չարաշահման պատճառը վիշտն էր` երկու տարվա ընթացքում նա կորցրեց իր սիրած կնոջը` Դայանա Հայլենդին, և հարազատ մորը։ Երբ Ջոնից երես թեքեցին բառացիորեն բոլորը, նրան անսպասելիորեն հյուր եկավ Դիանա արքայադուստրը։ «Դիանա արքայադուստրն իմ կյանք մտավ այն ժամանակ, երբ ինձ բոլորը մոռացել էին։ Երբ նա եկավ Ամերիկա, միակ բանը, որ նրան հետաքրքրել էր, իմ անձն էր։ Մեր համատեղ լուսանկարը վալս պարելիս թերթերի և ամսագրերի էջերին է։ Այդպես նա իրականացրեց իմ հետ պարելու իմ երազանքը և երկրորդ կյանք տվեց ինձ»։
3. Ջոն Տրավոլտան սայենթոլոգ է։ Նա ամենուր իր հետ տանում է Е-մետր սարքը, որով ստուգում է հոգևոր փոփոխություններն այն պահին, երբ պատմում է ուսուցչին իր խնդիրների մասին։ Կրոնական պատկանելիության պատճառով նա բազմիցս բարդ իրավիճակներում է հայտնվել։ Օրինակ, Գերմանիայում ցանկանում էին արգելել նրա որոշ ֆիլմերի ցուցադրությունները։
4. «Քրեական ընթերցվածքի» գանգստեր Վինսենթ Վեգայի դերը պետք է մարմնավորեր Մայքլ Մեդսոնը, բայց վերջին պահին նա հիվանդացել էր, և նրա փոխարեն հրավիրել էին բոլորի կողմից մոռացված Ջոն Տրավոլտային։ Եվ դա նրա երջանիկ անցագիրն էր դեպի հոլիվուդյան Օլիմպոսը։ Ումա Թուրմանի և Ջոն Տրավոլտայի պարն ամենաճանաչվածներից է 20–րդ դարի կինոպատմության մեջ։
Ի դեպ, Տրավոլտայի հոնորարը Տարանտինոյի ֆիլմում խաղալու համար կազմել է ընդամենը 150 հազար դոլար։ Բայց այդ ֆիլմի` էկրաններ բարձրանալուց հետո նրա հոնորարն աճել է մինչև 10 միլիոն դոլար, իսկ 1996 թվականին նրան մեկ ֆիլմի համար արդեն վճարում էին 17-21 մլն դոլար։
5. Յոթ տարի առաջ Տրավոլտան կորցրել է իր միակ որդուն` 16–ամյա Ջեթին։ Տղան տառապում էր Կավասակիի համախտանիշով։ Դա սուր տենդային հիվանդություն է, որն ախտահարում է անոթները։ Ջեթը մահացել է էպիլեպտիկ նոպայից լոգարանում։ Հայրը պաշտում էր որդուն, և տարիներ անց որդուն ուղղված սրտաճմլիկ և անկեղծ մի նամակ էր հրապարակել Facebook–ի իր էջում։
«Ասում են, որ ամենից ծանր է ծնողներին կորցնելը։ Կարող եմ հավաստիացնել, որ դա այդպես չէ։ Ամենածանրը, որ կարող է լինել այս աշխարհում, երեխայի կորուստն է։ Ում մեծացրել ես, հետևել, ում ամեն օր սեր ես նվիրել։ Իմ որդին ինձ համար ամեն ինչ էր։ 16 տարիների ընթացքում, որ միասին էինք, նա ինձ անվերապահ սիրել էր սովորեցրել։ Կյանքը կարճ է։ Երեխաներ, ժամանակ անցկացրեք ծնողների հետ։ Ծնողներ, ժամակա անցկացրեք երեխաների հետ։ Որովհետև մեկ օր, երբ գլուխներդ դուրս հանեք ձեր հեռախոսներից, նրանք կարող են ձեր կողքին չլինել։ Այն, ինչ իսկապես սովորել եմ, դա ապրելն է և սիրել այնպես, կարծես, դա քո վերջին օրն է»,– գրել է Ջոնը։ -0-
