ԵՐԵՎԱՆ, 17 նոյեմբերի. /Նովոստի-Արմենիա/. Հայաստանում աղանդների զարգացումը պետք է կանխել, քանի որ դրանք սպառնում են ազգային արժեքներին, հայտարարեց Քայքայիչ պաշտամունքներից տուժածների օգնության և վերականգնողական կենտրոնի ղեկավար Ալեքսանդր Ամարյանը։
«Կրոնական պատկանելիության ազատություննն ամրագրված է սահմանադրությամբ, սակայն չգիտես ինչու ոչ ոք ուշադրություն չի դարձնում, որ նույն օրենքի համաձայն, կրոնական շարժումը պետք է սահմանափակել, եթե այն վտանգ է ներկայացնում երկրի ազգային անվտանգության համար», - ասաց նա Հանդուրժողականության միջազգային օրվա կապակցությամբ անցկացված մամուլի ասուլիսի ժամանակ:
Ամարյանի խոսքով, տվյալ համատեքստում հանդուրժողականության մասին խոսելն անտեղի է, քանի որ հայ հասարակությունը ամեն ձևով խուսափում է այս հարցից:
«Հասարակությունը ոչ թե հանդուրժողական է տարատեսակ աղանդների հանդեպ, այլ ուղղակիորեն չի ցանկանում դիպչել այդ ոլորտին: Ոչ ոք չի ցանկանում միջամտել նրանց գործունեությանը: Դրանով չեն զբաղվում ոչ իրավապահ մարմինները, ոչ Հայ Առաքելական եկեղեցին, ոչ Ազգային անվտանգության ծառայությունը: Եվ պատճառն այն է, որ վախենում են», - կարծում է նա:
Ամարյանի խոսքով, 90-ականներին Հայաստանում աղանդավորները բնակչության 1 տոկոսից պակաս էին, այսօր այդ թիվը կազմում է 15 տոկոս, և դա շատ անհանգստացնող փաստ է:
«350 հազար պոտոնցիալ հավաքագրող: Աղանդավորների նման թիվը կարող է հանգեցնել ազգային արժեքների ոչնչացմանը», - հայտարարեց նա:
Հոգեթերապևտ Արմեն Ներսիսյանն իր հերթին նշեց, որ հավաքագրման համար աղանդների ղեկավարները օգտագործում են տարատեսակ մեթոդներ: Օրինակ, հատուկ հաճախականության վրա հնչող մեդիտացիոն երաժշտություն, արոմաթերապիա, հոգեբանական ազգեցություն, հիպնոս և նույնիսկ հոգեմետ նյութեր, որոնք ավելացվում են սննդի մեջ:
«Նման ազդեցությունից ոչ ոք ապահովագրված չէ, և դրան դիմակայելու միակ միջոցը սեփական ինքնությունը հասկանալն է», - հայտարարեց նա:
Ամենից հաճախ, մասնագետների կարծիքով, խայծը բռնում են երիտասարդները: «Երիտասարդությունը երկրի շարժիչ ուժն է և, հետևաբար, երկիրը թուլացնելու համար պետք է ճիշտ ուղուց շեղել երիտասարդներին: Եվ աղանդները դրանից օգտվում են. հավաքագրման բոլոր ծրագրերը ուղղված են հենց երիտասարդների վրա», - զգուշացնում է Ամարյանը:
Նա նաև ներկայացրեց վիճակագրական տվյալներ, համաձայն որոնց, այսօր Հայաստանում պաշտոնապես գրանցված է 65 կրոնական շարժում, որոնցից 12-ն ավանդական կրոններ են, մյուսները` աղանդներ:
«Չգրանցված աղանդներն ավելի քան 200-ն են, և նրանց մեծ մասը գործում է բարեգործական կազմակերպությունների, առողջապահական հաստատություններիի և այլ տեսքով», - նշեց Ամարյանը: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում