ԵՐԵՎԱՆ, 25 հունվարի. /Նովոստի–Արմենիա/. Forbes հեղինակավոր պարբերականը Դիլիջանի միջազգային դպրոցն (UWC Dilijan college) ընդգրկել է ռուսաստանյան միլիարդատերերի և նրանց աջակցությամբ ստեղծած կրթական ամենավարկանշային կենտրոնների հնգյակում։
«Միջազգային դպրոցը Ռուբեն Վարդանյանն իր կնոջ հետ բացել է 2014 թվականին։ Dilijan–ը տաղանդավոր երեխաների դպրոց–պանսիոն է։ Գտնվում է Հայաստանի համանուն քաղաքում և ընդգրկված է United World College տղանդավոր երեխաների միջազգային դպրոցների ցանցում»,– ասվում է ֆինանսական պարբերականի հոդվածում։
Դպրոց–պանսիոնը մարդասերներ Ռուբեն Վարդանյանի, Վերոնիկա Զոնաբենդի և նրանց գործընկերների համատեղ նախագիծ է։ Դպրոցի ճարտարապետական հայեցակարգը մշակել է բրիտանական Tim Flynn Architects բյուրոն։ Նախագծի առաջխաղացումն իրականացնում է RD Group միջազգային հոլդինգը։
UWC Dilijan College–ը 2015 թվականին պարգևատրվել է IGRA Green Roof Leadership Awards մրցանակով «Թրենդ թելադրող ճարտարապետություն» անվանակարգում և ճանաչվել է International Property Awards–ի եվրոպական փուլի հաղթող Public Services Development անվանակարգում։ Բացի այդ, UWC Dilijan College–ն ԱՊՀ տարածքում կրթական միակ հաստատությունն է, որը հավաստագրված է BREEAM էկոլոգիական շինարարության չափանիշներով։
Պարբերականի թոփ–ցանկում են նաև` միլիարդատեր Վադիմ Մոշկովիչի «Լետովո» դպրոցը, Ելենա Բատուրինայի «Առաջին մոսկովյան մասնավոր գիմնազիան», ինչպես նաև «Սիրիուս» կրթական կենտրոնը, որի հիմնադիրը Սերգեյ Ռոլդուգինի հիմնած «Տաղանդ և հաջողություն» հիմնադրամն է։
Վարկանշում ներկայացված է նաև ռուսաստանցի միլիարդատեր Զիյաուդին Մագոմեդովի «Փերի» բարեգործական հիմնադրամը։ 2017 թվականի սկզբին հիմնադրամի օժանդակությամբ կկառուցվի «Պերիմետր» կրթական կենտրոնը Մախաչկալայում։ -0-