Amazon-ում վաճառվող Apple-ի շատ ապրանքներ կեղծ են. Apple

ԵՐԵՎԱՆ, 22 հոկտեմբերի. /Նովոստի-Արմենիա/. Ամերիկյան Apple ընկերությունը հայտնել է, որ Amazon.com կայքից գնել է Apple-ի լիցքավորիչներ և մալուխներ, որոնք նշված են որպես իսկական, և հայտնաբերել է, որ դրանց մոտ 90 տոկոսը կեղծ է, հայտնում է tert.am-ը՝ հղում անելով The Wall Street Journal-ին:

Այս հայտարարությունն ընկերությունն արել է, երբ երկուշաբթի դատական հայց է ներկայացրել Նյու Ջերսիում գտնվող Mobile Star ընկերության դեմ՝ Amazon-ում կեղծ ապրանքներ վաճառելու մեղադրանքով:

Ինչպես հայտնում է պարբերականը, օրենսդրական հայցում Apple-ը նշել է, որ Mobile Star ընկերությունն Apple-ի լոգոներ է տեղադրել մալուխների և լիցքավորիչների վրա, որոնք «տաքանալու, այրվելու և էլեկտրահարման մեծ վտանգ են պարունակում»:

Ընկերությունը նշել է, որ լիցքավորիչներն ու լարերը վաճառվել են Amazon-ում՝ որպես Apple-ի արտադրանք:

Apple-ը նշել է, որ գնել է ապրանքներն Amazon-ում և այնուհետ հայտնել առցանց վաճառողին, որ դրանք կեղծ են: Amazon-ն էլ որպես վաճառող նշել է Mobile Star ընկերությանը, նշվում է հաղորդագրության մեջ: -0-