ԵՐԵՎԱՆ, 16 ապրիլի./Նովոստի–Արմենիա/. Hoppa տրանսֆերների որոնման ծառայության փորձագետները պարզել են, որ ճանապարհորդի հանգստի համար ամենաթանկը Դուբայն է, գրում է «Վոկրուգ սվետա» կայքը։ Այդ քաղաքում` Պարսից ծոցի ափին հանգիստը մեկ հոգու համար օրական կարժենա միջինը 398 դոլար։ Ծախսերի ամենաթանկարժեք մասը հյուրանոցն է` մոտ 306 դոլար։ Դուբայում սննդի համար հարկավոր է նախատեսել օրական մոտ 39 դոլար, ալկոհոլը ևս բավականին թանկ է, մեկ շիշ գինին արժե մոտ 25 դոլար։
Վարկանիշի երկրորդ հորիզոնականում Նյու Յորքն է։ Հայտնի «Ազատության» արձանն ու տեսարժան այլ վայրերը տեսնելու համար անհրաժեշտ է վճարել օրական մոտ 367 դոլար։ Նյու Յորքի համեմատ` Լոս Անջելեսը բավականին բյուջետային է։ Միջին օրական ծախսերը Լոս Անջելեսում կկազմեն մոտ 198 դոլար։
Հայաստանը 2016 թ.–ին ռուսաստանցիների հանգստի ամենահայտնի վայրերից մեկը կդառնա>>
Աֆրիկյան Բոտսվանայի զարմանահրաշ բնությանն ու կենդանական աշխարհին ծանոթանալու համար անհրաժեշտ է օրական վճարել 321 դոլար։ Էկզոտիկ այս երկիրը զբաղեցրել է հանգստի համար ամենաթանկարժեք ուղղությունների վարկանիշի երրորդ հորիզոնականը։ Բոտսվանայի համեմատ` Փարիզն ու Հռոմն արդեն այդքան էլ թանկ չեն թվում։ Եվրոպայի այս երկրներում մեկ օրվա բնակությունը կարժենա համապատասխանաբար 219 և 217 դոլար։
Վարկանիշի 18–րդ հորիզոնականում Մոսկվան է, որտեղ ճանապարհորդն օրական կծախսի մոտ 188 դոլար։ Ռուսաստանի մայրաքաղաքում բնակությունն էժան է ոչ միայն Հռոմից, այլ նաև Սիդնեյից (290 $), Լոնդոնից (273 $) և Դուբլինից (223 $)։
Ծովային հանգստի համար ամենահայտնի ուղղությունների թվում են Կիպրոսի Պաթոս քաղաքը (192 $), Մալթան (197 $) և դոմինիկյան Պունտա Կանան (199 $)։ Վարկանիշում են ներառվել նաև Մարաքեշը (319 $), Սինգապուրը (262 $), Կարակասը (246 $), Կանկունը (246 $), Լիման (227 $), Դուբլինը (223 $), Շանհայը (186$)։
Վարկանիշում հաշվի չի առնվում ավիատոմսերի արժեքը, որոնց գինը զգալիորեն ավելացնում է ճամփորդության բյուջեն։–0–