Անսպասելի շրջադարձ. ո՞վ է ինտրիգներ հյուսում Ջիգարխանյանի շուրջ և որքա՞ն գումար են նրանից գողացել (ՎԻԴԵՈ)

ԵՐԵՎԱՆ, 28 նոյեմբերի. /Նովոստի Արմենիա/. Այս աշնան, իսկ հնարավոր է անգամ տարվա ամենաաղմկահարույց ամուսնալուծության գործընթացում իրավական վերջակետ է դրվել։ Հայտնի դերասան Արմեն Ջիգարխանյանը և նրա արդեն նախկին կինը` Վիտալինա Ցիմբալյուկ–Ռոմանովսկայան, ազատ են ամուսնական կապերից։ Ընդ որում, նրանցից ոչ մեկ ներկա չի եղել դատական նիստին, նրանց շահերը ներկայացրել են փաստաբանները, հայտնում է vesti.ru–ն։

Թվում է, թե այս գործում կարելի է վերջակետ դնել, սակայն կրքերը չեն հանդարտվում։ Ջիգարխանյանի ընկերը` պրոդյուսեր Մարկ Ռուդինշտեյնը նշում է, որ դերասանի շուրջ հյուսվում է ստի մի շղթա, և այդ ամենը ղեկավարում է ոչ թե Վիտալինան, այլ նրա այսպես կոչված ներկայացուցիչ Էլինա Մազուրը։


Բացի այդ, Ռուդինշտեյնը հայտարարում է, որ դատավարությունից առաջ Վիտալինան գողացել է ոչ թե չորս, այլ տասը միլիոն ռուբլի։

Ընդ որում Վիտալինայի ներկայացուցիչ Էլինա Մազուրը նշում է, որ նախկին ամուսինները համատեղ կյանքի ընթացքում ոչ մի ընդանուր ունեցվածք չեն ունեցել. ամեն ինչ ձեռք է բերվել մինչև ամուսնանալը։

Միակ վիճահարույց պահը Մոսկվայում գտնվող տան վաճառքից ստացված մասնաբաժինն է, որը Ջիգարխանյանը չի ստացել, ինչպես նաև համատեղ կյանքի ընթացքում դերասանի կողմից կատարած կոմերցիոն գործարքից ստացված եկամտի մասնաբաժինը, որը չի ստացել Վիտալինան։ Այլ խոսքերով, ամբողջ գույքը գրանցված է Ցիմբալյուկ–Ռոմանովսկայայի անունով։


Հաղորդավար Ելենա Խանգան իր հերթին նշում է, որ այս պատմությունը կիսվում է երկու մասի։ Մի մասն իրավաբանական և ֆինանսական է (դրանով զբաղվում է դատարանը), իսկ երկրորդը` մարդկային։

«Երբ «ձմեռը» (նկատի ունեմ տարիքը) հանդիպում է «ամռանը», ապա շատ շուտով դրա համար պետք է վճարել», – նշել է հաղորդավարուհին։ –0–