Ղարաբաղում երկու աչքի վիրավորում ստացած զինծառայողը դուրս է գրվել հիվանդանոցից

ԵՐԵՎԱՆ, 16 մայիսի. /Նովոստի-Արմենիա/. Լեռնային Ղարաբաղի համակարտության գոտում ականապայթյունից երկու աչքի վիրավորում ստացած զինծառայող Մարտին Մարդիյանը դուրս է գրվել հիվանդանոցից, հաղորդում է ՀՀ առողջապահության նախարարության մամուլի ծառայությունը։

Վերջերս, Ս.Վ. Մալայանի անվան ակնաբուժական կենտրոնում զինվորը երկու վիրահատություն է տարել։ Երկու դեպքում էլ` սկզբում աջ, իսկ ապրիլի 4-ին` ձախ աչքի վիրահատության ընթացքում հեռացվել են ներակնային օտար մարմինները, մնացորդային հյուսվածքները: Վիրահատությունները բարեհաջող են անցել: Մասնագետների կողմից իրականացվել են անհրաժեշտ բոլոր միջոցները` վիրավորի տեսողությունը վերականգնելու համար:

Մարդիյանը բուժումը կշարունակի ամբուլատոր պայմաններում` Ս.Վ. Մալայանի անվան ակնաբուժական կենտրոնի հսկողության ներքո։

ԱՆ մամուլի ծառայությունից հիշեցրեցին, որ զինծառայողների բուժումը պետական միջոցներով արտասահմանյան երկրներում կազմակերպելու մասին ՀՀ կառավարության որոշումը վերաբերում է այն դեպքերին, երբ տվյալ բուժումը Հայաստանի Հանրապետությունում հնարավոր չէ կազմակերպել (բացակայում են անհրաժեշտ տեխնոլոգիաները կամ սարքավորումները, եթե չկա համապատասխան մասնագետ կամ փորձառություն)։

«Եթե, անկախ դրանից, հիվանդ զինվորը կամ նրա հարազատները նախընտրում են բուժումն իրականացնել արտերկրում, ապա ՀՀ առողջապահության նախարարությունը նրանց կողքին է ինչպես բարոյական աջակցություն ցուցաբերելու, այնպես էլ` զինվորների տեղափոխման գործընթացի մեթոդաբանությունը, անհրաժեշտ պայմաններն ու պահանջներն ապահովելու գործում», - նշվում է հաղորդագրության մեջ։

Ապրիլի 2–ից 5–ն ադրբեջանական ԶՈՒ–ն ղարաբաղա–ադրբեջանական շփման գծի հարավային, հարավարևելյան և հյուսիսարևելյան ուղղություններով ձեռնարկել է բացահայտ հարձակվողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները` հասցնելով մեծ վնասներ։ -0-