Հայտնի են Հայաստանի և Ադրբեջանի արտգործնախարարների հանդիպման ժամկետներն ու վայրը

20:58

16 Նոյեմբերի 2017

ԵՐԵՎԱՆ, 16 նոյեմբերի. /Նովոստի Արմենիա/. Հայաստանի արտաքին գործերի նախարար Էդվարդ Նալբանդյանը կհանդիպի իր ադրբեջանցի գործընկեր Էլմար Մամեդյարովի հետ դեկտեմբերին Վիեննայում կայանալիք ԵԱՀԿ նախարարների խորհրդի կուլուարներում։ Այդ մասին հայտնում է ԵԱՀԿ պաշտոնական էջը։

ԵԱՀԿ Մինսկի խմբի համանախագահները`Իգոր Պոպովը (ՌԴ), Ստեֆան Վիսկոնտին (Ֆրանսիա) և Էնդրյու Շեֆերը (ԱՄՆ) առանձին հանդիպումներ են անցկացրել Նալբանդյանի և Մամեդյարովի հետ։ Նախարարների հետ քննարկվել են Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` 2017 թվականի հոկտեմբերի 16–ին Ժնևի գագաթնաժողովում ձեռք բերված պայմանավորվածությունների իրագործման կոնկրետ քայլերը։

«Նախարարները պայմանավորվածություն են ձեռք բերել ԵԱՀԿ նախարարների խորհրդի կուլուարներում համատեղ նիստ անցկացնելու վերաբերյալ։ Համանախագահները կնախապատրաստեն այդ նիստի օրակարգը, որում կընդգրկվեն շփման գծում լարվածությունը նվազեցնելու կոնկրետ քայլեր»,– նշվում է պաշտոնական հաղորդման մեջ։

Загружается новость ... "Лево"

Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։ 1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։

Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։ Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ` հակամարտության խաղաղ կարգավորման ուղղությամբ` ԵԱՀԿ Մինսկի խմբի շրջանակում, որի համանախագահներն են ԱՄՆ-ն, Ռուսաստանը և Ֆրանսիան։-0-

Ծանոթացեք լուրերին առաջինն ու քննարկեք դրանք մեր Telegram-յան ալիքում

#Հայաստան #Ադրբեջան #ԱԳ նախարարներ #հանդիպում

Թեմատիկ նյութեր