ԵՐԵՎԱՆ, 4 փետրվարի./Նովոստի-Արմենիա/. Թուրքիայի խորհրդարանը վավերացրել է Ադրբեջանի հետ ռազմական համագործակցության մասին Շուշիի հռչակագիրը։ Այս մասին
հայտնում է «Известия»-ն՝ հղում անելով ադրբեջանական աղբյուրներին։
Փաստաթղթի ընդունմանը կողմ է քվեարկել 266, իսկ դեմ՝ 11 պատգամավոր։
«Պոլիտէկոնոմիա» հետազոտական ինստիտուտի քաղաքագետ Բենիամին Մաթևոսյանն ավելի վաղ «Նովոստի-Արմենիա» գործակալության համար գրված
վերլուծական հոդվածում նշել էր, որ 44-օրյա պատերազմից հետո օկուպացված հայկական Շուշիում ստորագրված հռչակագիրը, ըստ էության, ռազմաքաղաքական միության պակտ է, որն ամբողջովին հակահայկական (նաև հակառուսական և հակաիրանական) բնույթ ունի։
Նրա խոսքով, հռչակագիրը նախատեսում է, որ երկրները կշարունակեն համատեղ ջանքերը սպառազինության արդիականացման ուղղությամբ, այն նաև արտացոլում է կողմերի պայմանավորվածությունները, որոնք ուղղված են «համատեղ խորհրդակցություններ անցկացնելուն, միմյանց օգնություն ցուցաբերելուն երրորդ պետության կողմից երկու կողմերից որևէ մեկի ինքնիշխանության, անկախության, տարածքային ամբողջականության դեմ սպառնալիքի դեպքում» ։
«Եթե այս ձևակերպումները մեկնաբանենք ավելի հասկանալի լեզվով, ապա եթե վաղը Հայաստանի և Ադրբեջանի միջև նոր պատերազմ սկսվի, Թուրքիան, վկայակոչելով այս հռչակագրի կետերը, կարող է պաշտոնապես մտնել այս պատերազմի մեջ Բաքվի կողմից: Կամ, եթե վաղը Ադրբեջանը որոշի «հակաահաբեկչական օպերացիայի» անվան տակ պատերազմ հրահրել Արցախի դեմ, ապա այս դեպքում ևս, եթե Ադրբեջանը խնդրի, Թուրքիան կարող է պաշտոնապես իր զորքերը ուղարկել Արցախ»,- զգուշացրեց Մաթևոսյանը։
Փետրվարի 1-ին Ադրբեջանի խորհրդարանը հաստատել է Շուշիի հռչակագիրը։-0-
