ԵՐԵՎԱՆ, 3 մայիսի./Նովոստի–Արմենիա/. Թուրքիան փակել է իր օդային տարածքը հայկական ավիաընկերությունների ինքնաթիռների համար, որոնք թռչում են երրորդ երկրներ, չորեքշաբթի ասել է Թուրքիայի արտգործնախարար Մևլութ Չավուշօղլուն։
«Մենք Հայաստանի համար փակել ենք օդային տարածքը երրորդ երկրներ թռիչքների համար։ Անհրաժեշտության դեպքում ինքնաթիռներ կթողնենք մեր երկիր, բայց թույլ չենք տա օդանավերի և մասնավոր ինքնաթիռների անցումը մեր տարածքով, քանի դեռ սադրանքները շարունակվում են (Հայաստանի կողմից Թուրքիայի և Ադրբեջանի դեմ - ՏԱՍՍ)։ Եթե նրանք չդադարեն, ապա մենք այլ միջոցներ կձեռնարկենք»,- ասել է նա NTV հեռուստաալիքի եթերում, հաղորդում է ՏԱՍՍ-ը։
Ավելի վաղ հայտնի էր դարձել, որ Թուրքիան, առանց նախնական ծանուցման և առանց բացատրության,
արգելել է իր օդային տարածքի օգտագործումը FLYONE ARMENIA ավիաընկերության երկու օդանավերի համար, որոնք իրականացնում են Երևան–Փարիզ–Երևան չվերթը։
Այլ ԶԼՄ–ների տեղեկությունների համաձայն՝ Թուրքիայի նման դիրքորոշումը կապված է նախորդ շաբաթ Երևանի կենտրոնում
«Նեմեսիս» գործողության (Օսմանյան կայսրությունում Հայոց ցեղասպանության կազմակերպիչների դեմ հատուցման ակցիա) մասնակիցների հուշարձանի բացման հետ։ Հուշահամալիրի վրա փորագրված են ազգային արժանապատվության ասպետների անունները, ովքեր վրեժխնդիր են եղել 1,5 միլիոն հայերի մահվան համար։–0–
