Չպետք է սահմանափակվենք խաղաղության պայմանագրի ստորագրմամբ․ Միրզոյանը՝ Բայրամովի հետ հանդիպմանը

ԵՐԵՎԱՆ, 10 մայիսի․/Նովոստի–Արմենիա/․ Արտգործնախարար Արարատ Միրզոյանը Ալմաթիում Ադրբեջանի արտգործնախարար Ջեյհուն Բայրամովի հետ հանդիպումից առաջ իր բացման խոսքում նշել է, որ Հայաստանը տրամադրված է խաղաղությանը և խաղաղության պայմանագրի համաձայնեցմանը, հաղորդում է «Առաջին լրատվականը»։

«Մենք բանակցային գործընթացին ներգրավված ենք շատ կառուցողական: Մենք չպետք է սահմանափակվենք խաղաղության պայմանագրի ստորագրմամբ։ Մենք կարող ենք ավելի հեռուն գնալ՝ ապաշրջափակել տարածաշրջանի բոլոր տրանսպորտային հաղորդակցությունները»,- ասել է Միրզոյանը:

Բայրամովն էլ հայտարարել է, որ Բաքուն շատ մեծ ուշադրություն է հատկացնում այս գործընթացին, և պատրաստ է շարունակել աշխատանքը։

Նա հույս է հայտնել, որ Ալմաթիում բանակցությունները շատ օգտակար կլինեն։

«Հուսով եմ, որ մեզ կհաջողվի դրական աշխատանք կատարել հաջորդ երկու օրերին, որպեսզի հանգուցալուծում գտնենք դեռևս բաց մնացած հարցերին»,- ասել է Ադրբեջանի ԱԳ նախարարը: