Պետք է ձևավորվի մի քաղաքական ուժ, որը կստանձնի ձևավորված արժեքների հիման վրա առաջացած փոփոխությունների պատասխանատվությունը. Միրզոյան

ԵՐԵՎԱՆ, 2 օգոստոսի./Նովոստի–Արմենիա/. ՀՀ առաջին փոխվարչապետ Արարատ Միրզոյանը ներկայացրել է երկրի ներքաղաքական իրավիճակի զարգացման իր տեսլականը։ 

«ՀՀ-ում պետք է ձևավորվի մի քաղաքական ուժ, որի հիմքում ընկած կլինեն ոչ միայն «Քաղաքացիական պայմանագրի» և Փաշինյանի թիմակիցների առաջ բերած արժեհամակարգը, հեղափոխության նպատակներն ու արժեքները: այդ քաղաքական ուժը կստանձնի այդ արժեքների հիման վրա առաջացած բոլոր փոփոխությունների պատասխանատվությունն ու կդառնա այդ փոփոխությունների դրոշակակիրը: Այդ քաղաքական ուժի մեջ կարող են ներգրավված լինել տարբեր անհատներ և քաղաքական ու հասարակական կառույցի ներկայացուցիչներ», – ասաց փոխվարչապետը կառավարության նիստից առաջ։  

Նա նաև հայտարարեց, որ վաղ է խոսել «Ելքի» պառակտման մասին։ 

«Վաղ է նման եզրահանգումներ անել։ Եթե «Ելք» դաշինքում պառակտում լինի, այդ մասին անմիջապես պաշտոնապես կհայտարարվի», – ասաց նա։–0–