ԵՐԵՎԱՆ, 26 հունվարի. /Նովոստի–Արմենիա/.ԵԽԽՎ–ում երկու հակահայկական բանաձևերի քվեարկությունը կարելի է համարել լուրջ ձեռքբերում հայկական դիվանագիտության համար, «Նովոստի–Արմենիա» գործակալության ասաց քաղաքագետ Հրանտ Մելիք–Շահնազարյանը։
ԵԽԽՎ–ն երեքշաբթի մերժել է բրիտանացի Ռոբերտ Ուոլթերի հեղինակած «Բռնության աճը Լեռնային Ղարաբաղում և Ադրբեջանի այլ օկուպացված տարածքներում» հակահայկական բանաձևը։ Ավելի ուշ Վեհաժողովն ընդունեց բոսնիացի պատգամավոր Միլիցա Մարկովիչի հեղինակած «Ադրբեջանի սահմանամերձ բնակչությանը դիտավորյալ կերպով զրկել են ջրից» հակահայկական բանաձևը։
«Այս բանաձևերի նշանակությունը հարթեցվել էր քվեարկությունից առաջ ինչպես ԵԽԽՎ–ում հայկական դիվանագիտության, այնպես էլ ԵԱՀԿ ՄԽ ներկայացուցիչների հետ իրականացրած ակտիվ աշխատանքի շնորհիվ», – ասաց Մելիք–Շահնազարյանը։
Նրա խոսքով` բանաձևերն ընդհանրապես ունեին քարոզչական, այլ ոչ թե քաղաքական նշանակություն, այդուհանդերձ, Ադրբեջանն անգամ այս հարցում զիջեց։ «Երկու բանաձևերից անցավ այն մեկը, որն ավելի շատ մարդասիրական էր, այլ ոչ թե քաղաքական», – ասաց Մելիք–Շահնազարյանը։
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։ 1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։ 1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-