ԵՐԵՎԱՆ, 1 դեկտեմբերի./Նովոստի–Արմենիա/. ՀՀ պաշտպանության նախարարությունն ու Հունաստանի ազգային պաշտպանության նախարարությունը ստորագրել են ռազմական համագործակցության 2016 թվականի ծրագիրը, հաղորդում է ՀՀ պաշտպանության նախարարության մամուլի ծառայությունը։
Փաստաթուղթը ստորագրվել է ՀՀ ՊՆ պաշտպանական քաղաքականության վարչության պետ Լևոն Այվազյանի գլխավորած պատվիրակության` Հունաստան կատարած այցի շրջանակում։
Այցի ընթացքում Այվազյանը հանդիպել է Հունաստանի ազգային պաշտպանության գլխավոր շտաբի ռազմավարության և քաղաքականության դիրեկտորատի տնօրեն, դեր-ծովակալ Իոաննիս Պավլոպուլոսի և միջազգային համագործակցության վարչության պետ, բիգադի գեներալ Միլտիադիս Գրիլակիսի հետ:
Հանդիպումների ընթացքում քննարկվել են Հայաստանի Հանրապետության և Հունաստանի Հանրապետության միջև ռազմական համագործակցության զարգացմանը և խորացմանը, տարածաշրջանում տիրող իրավիճակին վերաբերող և երկկողմ հետաքրքրություն ներկայացնող այլ հարցեր:–0–