ԵՐԵՎԱՆ, 2 փետրվարի. /Նովոստի–Արմենիա/. Ադրբեջանի ԱԳՆ–ն մեկնաբանել է ՀՀ վարչապետ Նիկոլ Փաշինյանի հայտարարությունն այն մասին, որ «հայկական կողմը չի կարող անգամ քննարկել «տարածքներ խաղաղության դիմաց» ձևաչափը»։
«Պարոն Փաշինյանի տրամաբանությունը դժվար է հասկանալ։ Ինչպես հայտնի է, ղարաբաղյան հակամարտության կարգավորմանն ուղղված բանակցությունների հիմքում, որոնք անցկացվում է ԵԱՀԿ Մինսկի խմբի հովանու ներքո, ընկած է հենց հայկական զորքի դուրսբերումը Ադրբեջանի օկուպացված տարածքներից։ Այս պահանջն արտացոլված է ՄԱԿ Անվտանգության խորհրդի չորս բանաձևերում, ինչպես նաև հակամարտության կարգավորման շրջանակում միջազգային կազմակերպությունների կողմից ընդունված բոլոր փաստաթղթերում։ Այս դեպքում հարց է ծագում` պարոն Փաշինյանի այս դիրքորոշումն, արդյոք, չի՞ նշանակում բանակցություններից հրաժարվել», – նշվում է Ադրբեջանի ԱԳՆ–ի հայտարարության մեջ, հաղորդում է Ինտերֆաքս–Ադրբեջանը։
ԶԼՄ–ներում և սոցցանցերում ակտիվորեն քննարկվում է «որոշակի տարածքների վերադարձ խաղաղության դիմաց» դրույթը և ղարաբաղյան հակամարտության կողմերի միջև երկկողմ փոխզիջումների հնարավորությունը։
Որոշ փորձագետներ, մասնավորապես, ռուս քաղաքագետ Ստանիսլավ Տարասովը հայտարարել է, որ հունիսին Փաշինյանն ու Ալիևը Ղարաբաղի հարցով համաձայնագիր կստորագրեն, որում հայկական կողմը, անուղղակի փոխզիջումների ճնշման ներքո, ստիպված կլինի զիջել մի քանի շրջան։ Միաժամանակ, Ռուսաստանի պետական հումանիտար համալսարանի արտասահմանյան ռեգիոնագիտության և արտաքին քաղաքականության ամբիոնի դոցենտ, քաղաքագետ Սերգեյ Մարկեդոնովը կարծում է, որ այսօր չի երևում, որ կողմերի`միմյանց ընդառաջ գնացող քայլերը հանգեցնեն ակնհայտ շահույթի ինչպես Փաշինյանի, այնպես էլ Ալիևի համար։–0–
