ԵՐԵՎԱՆ, 13 դեկտեմբերի. /Նովոստի–Արմենիա/. Hraparak.am կայքը նախօրեին հաղորդել էր, որ Արցախի պաշտպանության բանակի ղեկավար Լևոն Մնացականյանն ազատվել է զբաղեցրած պաշտոնից։
Աղբյուրի հաղորդմամբ, խոսակցություն կա, որ իրենց պաշտոններին հրաժեշտ կտան նաև Արցախի ԱԱԽ քարտուղար Վիտալի Բալասանյանը և նախագահի խորհրդական Արշավիր Ղարամյանը։ Այսինքն, նրանք, ովքեր արձագանքել էին Սասուն Միքայելյանի հայտարարություններին այն մասին, որ «թավշյա հեղափոխության հաղթանակն ավելի կարևոր էր, քան Արցախյան ազատամարտը» և արժանացել Փաշինյանի զայրույթին։
Հակասություններ Երևանի և Ստեփանակերտի միջև
Պաշտոնական Երևանի և Ստեփանակերտի միջև հակասությունների հարցը դարձավ Հայաստանում նախորդ շաբաթ կայացած խորհրդարանական ընտրությունների քարոզարշավի առանցքային թեմաներից մեկը։ Քարոզարշավի ժամանակ ՀՀ վարչապետի պաշտոնակատար Նիկոլ Փաշինյանը հանդես եկավ հայտարարությամբ և կոչ արեց Արցախի նախագահին ուղարկել իշխանության ներկայացուցիչներին «իրենց աշխատանքով զբաղվելու»։
«Վերջին ժամանակներում այդքան էլ լավ չեմ հասկանում Արցախի իշխանությունների ակտիվությունը Հայաստանում նախընտրական գործընթացների վերաբերյալ: Չեմ հասկանում, թե ինչու են փորձում միջամտել Հայաստանում անցկացվող ընտրությունների գործընթացին: Ես հարցեր ունեմ և այդ հարցերը կքննարկեմ ԼՂՀ նախագահ Բակո Սահակյանի հետ, իսկ մինչ այդ ես պարոն Սահակյանին հորդորում եմ, որ կարգի հրավիրի իր կառավարության ներկայացուցիչներին և նրանց ուղարկի իրենց աշխատանքով զբաղվելու»,– հայտարարել էր Փաշինյանը։
«Արցախի նախագահի մամուլի խոսնակն օրումեջ իմ ասածի վերաբերյալ մեկնաբանություն է տալիս, այ քեզ բան: Նրանք չե՞ն մտածել, թե ինչ կլինի, եթե իմ մամուլի քարտուղարը սկսի մեկնաբանել հանրությանը հայտնի և ոչ հայտնի իրադարձություններն Արցախում: Սթափվեք, հարգելինե՛րս, և զբաղվեք ձեր աշխատանքով», – նշել էր ՀՀ վարչապետի պաշտոնակատարը։
Նա նաև նշել էր, որ անպայման կքննարկի այդ հարցը Արցախի իշխանությունների հետ և անձամբ Բակո Սահակյանի հետ, սակայն կանի դա դեկտեմբերի 9-ին անցկացվող ընտրություններից հետո:
Ամենայն հավանականությամբ այդ «քննարկումն» արդեն տեղի է ունեցել, ինչի վկայությունն են բարձրաստիճան ուժայինների հրաժարականները։
Հրաժարական եղե՞լ է, թե՞ ոչ
Սակայն արդեն այսօր առավոտյան Արցախի պաշտպանության նախարար, Պաշտպանության բանակի հրամանատար, գեներալ–լեյտենանտ Լևոն Մնացականյանը Tert.am–ին տված հարցազրույցում հերքեց իր հրաժարականի մասին շրջանառվող տեղեկությունները։
Արցախի նախագահի մամուլի քարտուղար Դավիթ Բաբայանն իր հերթին մեկնաբանելով շրջանառվող տեղեկությունները` նշել է. «եթե նման բան լինի, մենք կտարածենք պաշտոնապես»
Լևոն Մնացականյանը զբաղեցնում է Արցախի պաշտպանության նախարարի և ՊԲ հրամանատարի պաշտոնը 2015թ.–ի հունիսից։ 2012–2015թթ.–ին զբաղեցրել է ՀՀ ԶՈւ ԳՇ պետի տեղակալի պաշտոնը։–0–
